Tavidi Wukalungi Tuka Muna Kitadi
Mukunga wa mudimu wa Tavidi, tangwa kákala muna kitadi. Lombilu.
Tavidi kisi sambila muna fulu kya mu tadi amana kisi songila ni yandi mosi kaka kasalanga: tala ku lubakala lwama, kweku mutu wisi ngizaya, kweku kiswaminu kisadini, kweku mutu wena yi kyadi ho ni yenina yi moya. Kisi tela Tata wandi ndambu yandi muna tsi ya batu ba moya amana kisi lomba bamukatula mu boloku.
142 1Ni ndinga yama yikalunga kwena Tata wama; ni ndinga yama yilómba kyadi kwena yandi. a a v1 Masikili wenina mukunga wa ndonga wa kudibanzila; mukunga wafwana mu kubanza-banza, kaasi heku kaka mu kuyimbila. 2Yimwanga nyengi dyama ku thwala yandi; ku thwala yandi yisamuna kiwayi kyama. 3Tangwa kitembu kyama kisi lembwa mwena meni, ngeyi wuzayi nzila yama. Muna nzila yina yidyatila básweka mutambu kikuma kya meni. 4Tala ku lubakala lwama, amana wamona—kweku mutu wisi ngizaya; kweku kiswaminu kisadini kikuma kya meni; kweku mutu wena yi kyadi kya luzingu lwama. 5Yikalunga kwena ngeyi, A Tata wama; yizimbula: «Ngeyi wenina kiswaminu kyama, ndambu yama muna tsi ya batu ba moya.» 6Yuka kiwolu kyama, mukuma yenina mu kiphutu kya lawu. Ngihulula mwena babana bisi ndanda, mukuma balutini meni mu ngolu. 7Katula moya wama mu boloku, hanga yavutula matondu kwena khumbu yaku. Batu ba masonga bakakútakana mu kinzunga kyama, mukuma wukála wa mamboti ma lawu kwena meni.
