Guurse Daudi eng' Kebeneet
Tienwogitap utaatyet ne po Daudi, ye ki mi ineendet eng' kebeneet. Saaet.
Saaei Daudi eng' kebeneet ak kaboorunei kaing'orwet komugul: keer eng' eunnyu ne po tai, ak mami chii age ne ingeno anee, mami irimeet ne kagong'eton, mami chii ne mage ngo asabei. Guurei Kwandanyi kele kebebertanyi eng' emetap piik che sabei, ak soomei koistoigei eng' korgoreet.
142 1Eng' kutinnyu aguurse Kwandanyu; eng' kutinnyu asoome ineendet rireenet. a a v1 Maskil ko tienwogitap koneetisyet ne po bwaatet—tienwokit ne kiyae si kibwaatindos, ma kiti kityo. 2Atyachi riireennyu eng' taitap ineendet; eng' tainnyi amwachi nyalildanyu. 3Ye nyaluli kabuusennyu eng' oriitinnyu, inyee ne ingen ooreennyu. Eng' ooreet ne awendoti ko kagiuny mesteet agobo anee. 4Keer eng' eunnyu ne po tai ak igeer—ma mi chii age ne ingeno anee; ma ng'etunot irimeet agobo anee; ma mi chii ne mage saboondanyu. 5Aguurin inyee, Kwandanyu; ale, “Ii irimennyu, kebebertanyu eng' emetap piik che sabei.” 6Igas riireennyu, amu kagiming'in anee miising'. Isarwo eng' icheek che oonei anee, amu kiim icheek kosiiro. 7Isto saboondanyu eng' korgoreet, si agoochi kongoi kainneng'ung'. Yumjigei che po imanda koyiem, amu iyaiywo ne myee miising'.