Laa 143

143 ¹Iwui Avā, iwui seihā kasā nganāmilu; iwui kapokhon nāshungmilu; nawui ningkatong eina, nawui khamashung khangarong eina ili ngahānkāmilu. ²Naraoli bichar masaalu, kaja kharinga mi akhala na mangāli khamashunga maleimana. ^a a v2 Paulna khangazek hi khuirālaga hithada tamchithei: ithumwui Avāna khipānakha khalattawui otsak eina khamashungana da mashānkhuimana — Jishuli shitkasang eina maningla. ³Kaja yangkashena imanglā kharomkhuihaira; ana iwui mirin ngaleili sātekmihaira; ana ili achā thikahai mibing thāda tangkhamangli pamngasaka. ⁴Imanglā iwuklungli vānhaira; iwuklungli imalung matakhakhaira. ⁵Ina achālakhawui atam phaningunga; nana sākahai saikorali ina machukra; nawui pāngwui otsakli ina chukmaja̱ra. ⁶Nawuishong Ipāng katingvāli; imanglāna nawui vang thengkhamareng lam thāda ra̱changa.

⁷Iwui Avā, ili thākta ngahānkāmilu; imanglā kānhaira. Namai iwui eina mangathumihaialu, maningakha ina Chomli zangki kajebing thāda ngasāra. ⁸Ngathor nawui makhangachei leikashi ili shāser ngasakmilu, kaja ina nali shitsanga. Ina vāki kaji shongfa ili theingasakmilu, kaja imanglā nali yangkāli. ⁹Iwui Avā, iwui yangkashebingwui eina ili kanmilu; ina nawuishong mashi khavai yāmhaira. ¹⁰Nawui kaphaning sākhavai ili tamchitheimilu, kaja na iwui Avāna; nawui kaphā Manglāna ashāt ngaleili ili thānmiranu. ¹¹Namingwui vang eina, Iwui Avā, iwui mirin chi phārimilu; nawui khamashung khangarong eina kakhanangwui eina imanglā khuishokmilu. ¹²Kala nawui makhangachei leikashi eina nana iwui yangkashebing katattāmihaora, kala imanglāwui yangkashe saikora sāshimānhaora, kaja I naraona.