Laa 144

144 ¹Iwui lunghār, iwui Avāli soranu, ana ipāngli rai ngarar khavai, ipāngmareng raiwui vang tamchitheikhame, ²iwui makhangachei leikashi kala iwui ngavei, iwui raikānphung kala ili kankhame, iwui chāngvei, ina ali ngayinkhui, mibingli iwui azingli hamsang ngasakkhame.

³O iwui Avā, mi hi khipākhala, nana ali yangsangmi; miwui naomayara hi khipākhala, nana ali phaningmi? ⁴Mi hi khakkhā kathāna; awui atam makānvā khaya̱ kathāna.

⁵O iwui Avā, nawui kazingram ngashāntāda tunglu; kaphungli sāza̱lu, athumna meikhut shokra. ⁶Nawui rikhān khangashei horngasakta athumli chaiyāngmihaolu; nawui malāthing thairāda athumli ngacheengasaklu. ⁷Atungshong eina napāng katingvālu; huimilu, ili kapanga tara̱wui eina kanshokmilu, yur kateibingwui pāng eina, ⁸athum male eina kakapik matui, kala athumwui yāpāngna nguida tuingashit khui.

⁹O iwui Avā, nali ina laa kadhar sāra; khara̱ tharā kakā tingteilā eina nali nimshimri laa sāra, ¹⁰awungabingli khayui mikhame, awui rao Davidli sākashi raighaiwui eina kanshokkhame.

¹¹Huimilu, ili yur kateibingwui pāng eina kanshokmilu, athum male eina kakapik matui, kala athumwui yāpāngna nguida tuingashit khui.

¹²Chithākha nganuilakha kajuiva̱ phorkhavai, ithumwui naomayarabing thingnā thāra; ithumwui naongalāva̱bing konungwui vang ruksangkahai achikun pākra̱ thāra. ¹³Ithumwui zatchum khangatatei theishirai eina pemra; ithumwui luili ithumwui yaobing thingthing, thingtharāda mataisangra; ¹⁴ithumwui seibing nao phunglaga ritnai, phākho sakhai maleila, narkahaili vākahai maleila, kala ithumwui chānreili ningkachot khavao maleiranu. ¹⁵Hibing saikora khaleiwui mibing ringkaphāna; ithumwui Avā akhalattawui Varena khaleiwui mibing ringkaphāna!