መዝሙር 144 FHB Father's Heart Bible™

144 ¹ነእዳወይ ውግእ፥ ንኣፃብዐይ ድማ ኲናት ዝመሃረን ኣቦይ ከውሐይ ብሩኽ ይኹን፥ ²ምሕረተይን እምባይን፥ ዕርደይን መናገፍየይን፥ እቲ ዝዕቘቦ ዋልታይ፥ ኣብ ትሕተይ ንህዝብታት ዘግዝእ እዩ።

³ኦ ኣቦይ! ሰብ ብእኡ ኽትግደስ እንታይ እዩ? ወዲ ሰብከ ብዛዕባኡ ኽትሓስብ እንታይ እዩ? ⁴ሰብ ከም እስትንፋስ እዩ፤ መዓልቲታቱ ከም ዝሓልፍ ፅላሎት እየን።

⁵ኦ ኣቦይ! ሰማያትካ ኣድኒንካ ውረድ፤ ነቶም እምባታት ተንክኣዮም እሞ ክተኩ እዮም። ⁶መብረቕካ ኣብሪቕካ በትኖም፤ ፍላፃታትካ ወርዊርካ ሃውኾም። ⁷ካብ ላዕሊ ኢድካ ዘርጊሕካ፥ ካብቲ ብርቱዕ ማያትን ካብ ኢድ ደቂ ባዕድን ኣድሕነኒ ኣናግፈኒውን፤ ⁸ኣፎም ሓሶት ዝዛረቡ፥ የማናይ ኢዶምውን ብሓሰት ዝምሕል እዮም።

⁹ኦ ኣቦይ! ሓዱሽ መዝሙር ክዝምረልካ እየ፤ ዓሰርተ ኣውታር ብዘለዎ በገና ድማ ክቕነየልካ እየ፥ ¹⁰ንነገስታት ዓወት ንዝህብ፥ ንዳዊት ባርያኡ ካብ ጨካን ሰይፊ ንዘናግፍ።

¹¹ካብ ኢድ ደቂ ባዕዲ ኣድሕነኒ ኣናግፈኒውን፤ ኣፎም ሓሶት ዝዛረቡ፥ የማናይ ኢዶምውን ብሓሰት ዝምሕል እዮም።

¹²ሽዑ ኣወዳትና ኣብ ንእስነቶም ከም ነዊሑ ዝዓበየ ተኽሊ፥ ኣጓላትና ድማ ከም ንቤተ መንግስቲ ዝተቐርፀ መኣዝናዊ ኣዕማድ ክኾኑ እዮም። ¹³ማዕኸንና ብዅሉ ዓይነት እቶት መሊኡ ክህብ እዩ፤ ኣባጊዕና ኣብ ገራሁና ብሽሕን ብእልፍን ክበዝሓ እየን፤ ¹⁴ኣሓና ዝፀነሳ፥ ቅፅሪ ከይፈረሰ፥ ናብ ምርኮ ከይተማረኽና፥ ኣብ ኣደባባያትና ድማ ኣውያት ጭንቂ ከይተሰምዐ። ¹⁵ከምዙይ ዝበለ ዘለዎ ህዝቢ ብፁእ እዩ፤ ኣቦና ናቱ ዝኾነ ህዝቢ ብፁእ እዩ።