ಕೀರ್ತನೆಗಳು 144 FHB Father's Heart Bible™

144 ¹ಯುದ್ಧಕ್ಕಾಗಿ ನನ್ನ ಕೈಗಳನ್ನೂ ಕಾಳಗಕ್ಕಾಗಿ ನನ್ನ ಬೆರಳುಗಳನ್ನೂ ಪಳಗಿಸುವ ನನ್ನ ಬಂಡೆಯಾದ ನನ್ನ ತಂದೆಗೆ ಸ್ತೋತ್ರವಾಗಲಿ. ²ನನ್ನ ಒಡಂಬಡಿಕೆಯ ಪ್ರೀತಿಯೂ ನನ್ನ ದುರ್ಗವೂ, ನನ್ನ ಕೋಟೆಯೂ ನನ್ನ ವಿಮೋಚಕನೂ, ನಾನು ಆಶ್ರಯಿಸುವ ನನ್ನ ಗುರಾಣಿಯೂ ಅವರೇ ಆಗಿದ್ದಾರೆ; ಜನಾಂಗಗಳನ್ನು ನನ್ನ ಅಧೀನಕ್ಕೆ ತರುತ್ತಾರೆ.

³ನನ್ನ ತಂದೆಯೇ, ನೀವು ಗಮನಿಸುವಷ್ಟಕ್ಕೆ ಮನುಷ್ಯನು ಎಷ್ಟರವನು? ನೀವು ನೆನೆಯುವಷ್ಟಕ್ಕೆ ಮನುಷ್ಯಪುತ್ರನು ಎಂಥವನು? ⁴ಮನುಷ್ಯನು ಉಸಿರಿನಂತಿದ್ದಾನೆ; ಅವನ ದಿನಗಳು ಗತಿಸಿಹೋಗುವ ನೆರಳಿನಂತಿವೆ.

⁵ನನ್ನ ತಂದೆಯೇ, ನಿಮ್ಮ ಆಕಾಶಗಳನ್ನು ಬಾಗಿಸಿ ಇಳಿದುಬನ್ನಿ; ಬೆಟ್ಟಗಳನ್ನು ಮುಟ್ಟಿರಿ, ಆಗ ಅವು ಹೊಗೆಯಾಡುವವು. ⁶ನಿಮ್ಮ ಮಿಂಚನ್ನು ಹೊಳೆಯಿಸಿ ಅವರನ್ನು ಚದರಿಸಿ; ನಿಮ್ಮ ಬಾಣಗಳನ್ನು ಎಸೆದು ಅವರನ್ನು ಓಡಿಸಿ. ⁷ಉನ್ನತದಿಂದ ನಿಮ್ಮ ಕೈಚಾಚಿರಿ; ಮಹಾಜಲಗಳಿಂದಲೂ ಅನ್ಯದೇಶೀಯರ ಕೈಯಿಂದಲೂ ನನ್ನನ್ನು ಬಿಡಿಸಿ ವಿಮೋಚಿಸಿ, ⁸ಅವರ ಬಾಯಿಗಳು ಸುಳ್ಳನ್ನು ನುಡಿಯುತ್ತವೆ, ಅವರ ಬಲಗೈ ಸುಳ್ಳಾಗಿ ಪ್ರಮಾಣಮಾಡುತ್ತದೆ.

⁹ನನ್ನ ತಂದೆಯೇ, ನಿಮಗೆ ಹೊಸ ಹಾಡನ್ನು ಹಾಡುವೆನು; ಹತ್ತು ತಂತಿಯ ವೀಣೆಯಿಂದ ನಿಮಗೆ ಗಾನಮಾಡುವೆನು, ¹⁰ಅರಸರಿಗೆ ಜಯವನ್ನು ಅನುಗ್ರಹಿಸುವಾತನಿಗೆ, ತಮ್ಮ ಸೇವಕನಾದ ದಾವೀದನನ್ನು ಕ್ರೂರ ಕತ್ತಿಯಿಂದ ಬಿಡಿಸುವಾತನಿಗೆ ಗಾನಮಾಡುವೆನು.

¹¹ಅನ್ಯದೇಶೀಯರ ಕೈಯಿಂದ ನನ್ನನ್ನು ಬಿಡಿಸಿ ವಿಮೋಚಿಸಿ; ಅವರ ಬಾಯಿಗಳು ಸುಳ್ಳನ್ನು ನುಡಿಯುತ್ತವೆ, ಅವರ ಬಲಗೈ ಸುಳ್ಳಾಗಿ ಪ್ರಮಾಣಮಾಡುತ್ತದೆ.

¹²ಆಗ ನಮ್ಮ ಪುತ್ರರು ಎಳೆತನದಲ್ಲಿ ಎತ್ತರವಾಗಿ ಬೆಳೆದ ಸಸಿಗಳಂತಿರುವರು, ನಮ್ಮ ಪುತ್ರಿಯರು ಅರಮನೆಗಾಗಿ ಕೆತ್ತಿದ ಮೂಲೆಯ ಕಂಬಗಳಂತಿರುವರು. ¹³ನಮ್ಮ ಕಣಜಗಳು ತುಂಬಿ ಸಕಲವಿಧದ ಬೆಳೆಯನ್ನು ಒದಗಿಸುವವು; ನಮ್ಮ ಕುರಿಹಿಂಡುಗಳು ಸಾವಿರಗಟ್ಟಲೆಯಾಗಿ, ನಮ್ಮ ಹೊಲಗಳಲ್ಲಿ ಹತ್ತುಸಾವಿರಗಟ್ಟಲೆಯಾಗಿ ಹೆಚ್ಚುವವು; ¹⁴ನಮ್ಮ ದನಗಳು ಕರುಗಳನ್ನು ಹೊತ್ತಿರುವವು, ಗೋಡೆಗಳು ಒಡೆಯುವುದಿಲ್ಲ, ಯಾರೂ ಸೆರೆಗೆ ಒಯ್ಯಲ್ಪಡುವುದಿಲ್ಲ, ನಮ್ಮ ಬೀದಿಗಳಲ್ಲಿ ಗೋಳಾಟವೂ ಇರುವುದಿಲ್ಲ. ¹⁵ಇಂಥ ಸ್ಥಿತಿ ಇರುವ ಜನರು ಧನ್ಯರು; ನಮ್ಮ ತಂದೆಯೇ ತಮ್ಮವರಾಗಿರುವ ಜನರು ಧನ್ಯರು.