Saamu 144

144 ¹Ìbùkún ni fún Baba mi, àpáta mi, ẹni tí ń kọ́ ọwọ́ mi fún ogun, àti ìka mi fún ìjà, ²ìfẹ́ májẹ̀mú mi àti odi mi, ibi agbára mi àti olùgbàlà mi, asà mi, ẹni tí mo ń sá di, ẹni tí ń tẹrí àwọn ènìyàn ba lábẹ́ mi.

³Baba mi, kín ni ènìyàn tí ìwọ fi ń kà á sí, ọmọ ènìyàn tí ìwọ fi ń ronú nípa rẹ̀? ⁴Ènìyàn dàbí èémí; ọjọ́ rẹ̀ dàbí òjìji tí ń kọjá lọ.

⁵Baba mi, tẹ àwọn ọ̀run rẹ ba kí o sì sọ̀kalẹ̀; fọwọ́ kan àwọn òkè, wọn yóò sì rú èéfín. ⁶Mú mànàmáná rẹ kọ̀ọ́ kí o sì tú wọn ká; ta àwọn ọfà rẹ kí o sì lé wọn lọ. ⁷Na ọwọ́ rẹ láti òkè wá; gbà mí là, kí o sì yọ mí kúrò nínú omi ńlá, kúrò lọ́wọ́ àwọn àjèjì, ⁸àwọn ẹni tí ẹnu wọn ń sọ irọ́, tí ọwọ́ ọ̀tún wọn sì ń búra èké.

⁹Baba mi, èmi yóò kọ orin tuntun sí ọ; lórí dùùrù olókùn mẹ́wàá ni èmi yóò ṣe orin sí ọ, ¹⁰sí ẹni tí ń fi ìṣẹ́gun fún àwọn ọba, ẹni tí ń gba Dafidi ìránṣẹ́ rẹ̀ là kúrò lọ́wọ́ idà ìkà.

¹¹Gbà mí là, kí o sì yọ mí kúrò lọ́wọ́ àwọn àjèjì, àwọn ẹni tí ẹnu wọn ń sọ irọ́, tí ọwọ́ ọ̀tún wọn sì ń búra èké.

¹²Nígbà náà, àwọn ọmọkùnrin wa yóò dàbí ohun ọ̀gbìn tí ó dàgbà ga ní ìgbà èwe wọn, àwọn ọmọbìnrin wa yóò dàbí ọwọ̀n igun tí a gbẹ́ fún ààfin. ¹³Àwọn àká wa yóò kún, tí yóò máa pèsè onírúurú èso; agbo ẹran wa yóò pọ̀ sí i ní ẹgbẹ̀rún, ní ẹgbẹ̀rún mẹ́wàá ní pápá wa; ¹⁴àwọn màlúù wa yóò máa bímọ, láìsí fífọ́ ògiri lulẹ̀, láìsí lílọ sí ìgbèkùn, àti láìsí igbe ìpọ́njú ní àwọn òpópónà wa. ¹⁵Ìbùkún ni fún àwọn ènìyàn tí irú nǹkan bẹ́ẹ̀ jẹ́ tiwọn; ìbùkún ni fún àwọn ènìyàn tí Baba wa jẹ́ tiwọn.