Mwala Wanga, Pakubisamira Panga
Wa Dhavidhi.
Dhavidhi asatoma na manja akupfundziswa nkhondo, mbapang'onthiratu kuvomereza kuti munthu ndi wacabe — mphepo, mthunzi unapita. Asaphemba Baba wace kuti agobise dzulu mbabwera, mbamupulumusa kwa anyandima, buluka penepo asalonga ntendere unafuna iye: nkhokwe zakudzala na ana anakula mwadidi.
144 1Mbasimbwe Baba wanga, mwala wanga, ule anapfundzisa manja manga toera nkhondo, minwe yanga toera kumenya nkhondo, 2ndiye wakundikomera ntima na nsasa wanga, linga yanga na nyakundipulumusa, xango yanga munabisamira Ine, ule anagonjesa mitundu ya anthu pantsi panga.
3Baba wanga, munthu ndi ninji toera imwe mumudzindikire, mwana wa munthu toera imwe munankumbuka? 4Munthu ali ninga mphepo basi; ntsiku zace ziri ninga nthundzi inapita.
5Baba wanga, gomesani thambo yanu, bulukani; khuyani mapiri, penepo anapfungaira utsi. 6Cetesani njazi yanu, amwazani iwo; ponyani miseve yanu, thamangisani iwo. 7Tambalizani djanja yanu kubulukira kudzulu; ndipulumuseni, ndibulusani m'madzi makulu, m'manja mwa anthu acilendo, 8akuti milomo yawo isalonga uthambi, na djanja yawo yamadyo isadumbira mwauthambi.
9Baba wanga, ndinakuimbirani nyimbo ipsa; pa citeto ca ntambo khumi ndinakuimbirani, 10kuna Imwe ule munapasa amambo kupembera, ule munapulumusa Dhavidhi ntumiki wanu ku supada yaukali.
11Ndipulumuseni, ndibulusani m'manja mwa anthu acilendo, akuti milomo yawo isalonga uthambi, na djanja yawo yamadyo isadumbira mwauthambi.
12Penepo anawo athu anakhala ninga miti yakukula mu uphale wawo, anankazi athu ninga mizati ya pa makona yakusemwa toera nyumba yaumambo. 13Nkhokwe zathu zinadzala, zakupereka misambo yonsene ya cakubala; mikumbi yathu inathimizirika na cikwi, na makumi a pikwi m'minda mwathu; 14ng'ombe zathu zanekene na ana, mwakukhonda kugswedeka kwa makhoma, nkhabe kuendeswa ku ubitcu, nkhabe kulira kwa nyatwa m'miseu mwathu. 15Akukomerwa anthu akuti pinthu pyenepi ndi pyawo; akukomerwa anthu akuti Baba wathu ndi wawo ene.
