സങ്കീർത്തനങ്ങൾ 144 FHB Father's Heart Bible™

144 ¹യുദ്ധത്തിന് എന്റെ കൈകളെയും പോരാട്ടത്തിന് എന്റെ വിരലുകളെയും അഭ്യസിപ്പിക്കുന്ന, എന്റെ പാറയായ എന്റെ പിതാവ് വാഴ്ത്തപ്പെടുമാറാകട്ടെ, ²എന്റെ അചഞ്ചലസ്നേഹവും എന്റെ കോട്ടയും, എന്റെ ദുർഗവും എന്നെ വിടുവിക്കുന്നവനും, ഞാൻ അഭയം പ്രാപിക്കുന്ന എന്റെ പരിചയും ആകുന്നു അവിടുന്ന്; ജനതകളെ എനിക്കു കീഴ്പെടുത്തുന്നതും അവിടുന്നുതന്നെ.

³എന്റെ പിതാവേ, അങ്ങ് മനുഷ്യനെ ഗണ്യമാക്കുവാൻ അവൻ എന്തുള്ളൂ? അങ്ങ് മനുഷ്യപുത്രനെ ഓർക്കുവാൻ അവൻ എന്തുമാത്രം? ⁴മനുഷ്യൻ ഒരു ശ്വാസംപോലെ ആകുന്നു; അവന്റെ നാളുകൾ കടന്നുപോകുന്ന നിഴൽപോലെ.

⁵എന്റെ പിതാവേ, അങ്ങയുടെ ആകാശത്തെ കുനിച്ച് ഇറങ്ങിവരണമേ; പർവതങ്ങളെ തൊടണമേ, അപ്പോൾ അവ പുകയും. ⁶അങ്ങയുടെ മിന്നൽ അയച്ച് അവരെ ചിതറിക്കണമേ; അങ്ങയുടെ അസ്ത്രങ്ങൾ എയ്ത് അവരെ തകർക്കണമേ. ⁷ഉയരത്തിൽനിന്ന് അങ്ങയുടെ കൈ നീട്ടണമേ; എന്നെ വിടുവിച്ച് പെരുവെള്ളത്തിൽനിന്നും അന്യജാതിക്കാരുടെ കൈയിൽനിന്നും എന്നെ രക്ഷിക്കണമേ, ⁸അവരുടെ വായ് വ്യാജം സംസാരിക്കുന്നു, അവരുടെ വലങ്കൈ കള്ളസത്യവും ചെയ്യുന്നു.

⁹എന്റെ പിതാവേ, ഞാൻ അങ്ങയ്ക്ക് ഒരു പുതിയ പാട്ടു പാടും; പത്തുതന്ത്രിയുള്ള വീണമേൽ ഞാൻ അങ്ങയ്ക്കു കീർത്തനം ചെയ്യും, ¹⁰രാജാക്കന്മാർക്കു ജയം നല്കുന്നവന്, തന്റെ ദാസനായ ദാവീദിനെ ക്രൂരവാളിൽനിന്നു വിടുവിക്കുന്നവന്.

¹¹അന്യജാതിക്കാരുടെ കൈയിൽനിന്ന് എന്നെ വിടുവിച്ചു രക്ഷിക്കണമേ; അവരുടെ വായ് വ്യാജം സംസാരിക്കുന്നു, അവരുടെ വലങ്കൈ കള്ളസത്യവും ചെയ്യുന്നു.

¹²അപ്പോൾ നമ്മുടെ പുത്രന്മാർ ബാല്യത്തിൽ വളർന്നുയർന്ന തൈകൾപോലെയും, നമ്മുടെ പുത്രിമാർ കൊട്ടാരത്തിനായി കൊത്തിയെടുത്ത മൂലത്തൂണുകൾപോലെയും ആയിരിക്കും. ¹³നമ്മുടെ കളപ്പുരകൾ നിറഞ്ഞ്, സകലവിധ വിളവുകളും നല്കും; നമ്മുടെ ആട്ടിൻകൂട്ടങ്ങൾ നമ്മുടെ വയലുകളിൽ ആയിരങ്ങളായും പതിനായിരങ്ങളായും പെരുകും; ¹⁴നമ്മുടെ കന്നുകാലികൾ ചനയുള്ളവയായിരിക്കും; മതിലുകൾ തകർക്കപ്പെടുകയില്ല, പ്രവാസത്തിലേക്കു പോകുന്നതുമില്ല, നമ്മുടെ തെരുവുകളിൽ കഷ്ടതയുടെ നിലവിളിയും ഉണ്ടാകയില്ല. ¹⁵ഇങ്ങനെയുള്ളവ ലഭിച്ച ജനം ഭാഗ്യമുള്ളവർ; നമ്മുടെ പിതാവിനെ തങ്ങളുടെ സ്വന്തമായുള്ള ജനം ഭാഗ്യമുള്ളവർ.