መዝሙር 143 FHB Father's Heart Bible™

143 ¹ኦ ኣቦይ፥ ፀሎተይ ስማዕ፤ ምህለላ ምሕረተይ ስማዕ፤ ብሓቅነትካን ብፅድቅኻ መልሰለይ። ²ንባርያኻ ናብ ፍርዲ ኣይተምፅኦ፤ ኣብ ቅድሜኻ ፃድቕ ዝኾነ ህያው ሰብ የለን እሞ። ^a a v2 ጳውሎስ ብዛ ቃል እዚኣ ተጠቒሙ፥ ሓደ እኳ ብናይ ባዕሉ ግብሪ ምስ ኣቦና ፅዱቕ ከም ዘይኸውን፥ ብምእማን ኢየሱስ ጥራሕ ደኣ ከም ዝኸውን መሃረ። ³እቲ ፀላኢ ንነፍሰይ ሰጒጉ እዩ እሞ፤ ንህይወተይ ናብ ምድሪ ጨፍለቓ፤ ከምቶም ካብ ነዊሕ ዝሞቱ ኣብ ፀልማት ከም ዝነብር ገይሩኒ። ⁴መንፈሰይ ኣብ ውሽጠይ ደኸመ፤ ልበይ ድማ ኣብ ውሽጠይ ሰንበደ። ⁵ነተን ናይ ጥንቲ መዓልቲታት እዝክረን ኣለኹ፤ ንዅሉ ዝገበርካዮ አስተንትኖ ኣለኹ፤ ብዛዕባ ግብሪ ኣእዳውካ እሓስብ ኣለኹ። ⁶ኣእዳወይ ናባኻ እዝርግሕ ኣለኹ፤ ነፍሰይ ከም ንቑፅ ምድሪ ንኣኻ ፀምአት።

⁷ኦ ኣቦይ፥ ቀልጢፍካ መልሰለይ፤ መንፈሰይ ይሓልቕ ኣሎ። ገፅካ ካባይ ኣይትሰውር፤ እንተ ዘይኮነ ከምቶም ናብ ጕድጓድ ዝወርዱ ክኸውን እየ። ⁸ብጊሓት ምሕረትካ ኣስምዓኒ፥ ብኣኻ ተኣሚነ እየ እሞ። እታ ዝኸዳ መንገዲ ኣርእየኒ፥ ነፍሰይ ናባኻ ኣልዒለ እየ እሞ። ⁹ኦ ኣቦይ፥ ካብ ፀላእተይ ኣናግፈኒ፤ ክዕቆብ ኢለ ናባኻ ሃዲመ እየ። ¹⁰ፍቓድካ ክገብር መሃረኒ፥ ንስኻ ኣቦይ ኢኻ እሞ፤ እቲ ሰናይ መንፈስካ ናብ ሰጥ ዝበለ ምድሪ ይምርሓኒ። ¹¹ኦ ኣቦይ፥ ምእንቲ ስምካ ኢልካ ንህይወተይ ኣድሕና፤ ብፅድቅኻ ንነፍሰይ ካብ መከራ ኣውፅኣ። ¹²ብምሕረትካ ድማ ንፀላእተይ ክትቍርፆም ኢኻ፤ ንዅሎም ተፃረርቲ ነፍሰይ ድማ ክተጥፍኦም ኢኻ፥ ኣነ ባርያኻ እየ እሞ።