Zaburi 143

143 ¹Baba yangu, sikia sala yangu; tega sikio kwa maombi yangu ya rehema; nijibu kwa uaminifu wako, kwa haki yako. ²Usimlete mtumishi wako hukumuni, kwa maana hakuna aliye hai mwenye haki mbele zako. ^a a v2 Paulo alitumia mstari huu kufundisha kwamba hakuna afanywaye kuwa mwenye haki mbele za Baba yetu kwa matendo yake mwenyewe — bali ni kwa kumtumaini Yesu tu. ³Kwa maana adui ameifuatia nafsi yangu; ameuponda uzima wangu chini ardhini; amenifanya nikae gizani kama wale waliokufa zamani. ⁴Roho yangu inazimia ndani yangu; moyo wangu ndani yangu unafadhaika. ⁵Nakumbuka siku za kale; nayatafakari yote uliyoyatenda; nauwaza kazi ya mikono yako. ⁶Nakunyooshea mikono yangu; nafsi yangu inakuonea kiu kama nchi kavu iliyokauka.

⁷Nijibu upesi, Baba yangu; roho yangu inazimia. Usinifiche uso wako, nisije nikawa kama wale washukao shimoni. ⁸Unijulishe upendo wako wa agano wakati wa asubuhi, kwa maana nakutumaini wewe. Nionyeshe njia nitakayoiendea, kwa maana nakuinulia nafsi yangu wewe. ⁹Uniokoe na adui zangu, Baba yangu; nimekimbilia kwako kupata hifadhi. ¹⁰Nifundishe kuyatenda mapenzi yako, kwa maana ndiwe Baba yangu; Roho wako mwema aniongoze katika nchi tambarare. ¹¹Kwa ajili ya jina lako, Baba yangu, uhifadhi uzima wangu; kwa haki yako uitoe nafsi yangu katika taabu. ¹²Na kwa upendo wako wa agano utawakatilia mbali adui zangu na kuwaangamiza wote wanaoiudhi nafsi yangu, kwa maana mimi ni mtumishi wako.