Iwui Avā, Iwui Awunga
Masot laa akha. Davidwui.
Davidwui alphabet mashing eina kasā sochikat laa, kasā kachida ngaphorkahai: thot akhana thot khangateili awui Avāwui otsak masochikatra, ana pāng shoakha kharing yur kachiva̱na zāt samphang, kala kurhaobing saikorali khāngkhui. Awui lukhamashan ana sākahai saikorawuitungli leichinga da hānga.
145 1Ina nali sora, iwui Avā, iwui Awunga, kala namingli mashimānda ina sochikatra.
2Thangkachida ina nali soli, kala mashimānda namingli ina masot mira. 3Ithumwui Avā hakmahālaka, kala masot mikhangaye; awui reikhamatai maphākhuirarmana.
4Thot akhana thot khangateili nawui otsak masochikatra, kala nawui hakkhamahā otsak phongra. 5Nawui khangamkharei tekhamatei khayākakāli, kala nawui matakhak kahai otsakli ina machukra. 6Athumna nawui khangachee-khangachā otsakwui pangshap hāngra, kala ina nawui reikhamatai vaora. 7Athumna nawui kaphā mavātlakwui mingkhamayāng chungmeida vaora, kala khamathānkhon eina nawui khamashung khangarong laa sāra.
8Ithumwui Avā lumashankatha̱a kala lumashantheilaka, malung mavatkazāra kala makhangachei leikashi pemtinghai. 9Ithumwui Avā saikorali kaphāna, kala awui lukhamashan pemting ana sākahai saikorawuitungli leichinga. 10Nawui otsak saikorana nali ningkashi mira, O ithumwui Avā, kala nawui katharabingna nali sora. 11Athumna nawui wungramwui tekhamatei hāngra kala nawui pangshap vaora, 12kala miwui naomayarabingli nawui hakkhamahā otsak kala nawui wungramwui khayākakā tekhamatei theingasakra. 13Nawui wungram katang makhavai wungramna, kala nawui pangshap thot kachida vāpei. Ithumwui Avā awui tui saikorali ningkatonga kala awui otsak saikorali lumashana. a a v13 Kachon hi Hebrew lairik kachungkhali maleimana, kha Dead Sea Scrolls kala achālakhawui Greek lairiklila lei. Laa hi Hebrew akkhara saikorawui athishurda zata, kala kachon hi maleiakha akkhara akha horhaira.
14Ithumwui Avāna kongluibing saikorali singkhāngmi, kala kurhaobing saikorali khāngkhui. 15Saikorawui mikna nalishong yangchinga, kala nana atam athishurda athumli kashakazā mi. 16Nana nawui pāng sho, kala kharing yur kachiva̱wui ningkachāng phaui ngasak.
17Ithumwui Avā awui apong saikorali khamashunga, kala awui otsak saikorali ningkatonga. 18Ithumwui Avāna ali khangakao saikorali nganaimi, khamashung eina ali khangakao saikorali nganaimi. 19Ali khangachee saikorawui ningkachāng chi ana ungshungmi; athumwui khavao ana shāmi kala athumli huimi. 20Ithumwui Avāna ali leishi saikorali yangmi, kha makhayā saikorali ana sāshimānra.
21Ikhamorna ithumwui Avāwui masot chi chitheira; kharing yur kachiva̱na awui katharamingli mashimānda mashimānla soranu.
