ਜ਼ਬੂਰ 145

145 ¹ਮੈਂ ਤੇਰੀ ਵਡਿਆਈ ਕਰਾਂਗਾ, ਮੇਰੇ ਪਿਤਾ, ਮੇਰੇ ਰਾਜਾ, ਅਤੇ ਮੈਂ ਤੇਰੇ ਨਾਮ ਨੂੰ ਸਦਾ ਤੇ ਸਦਾ ਮੁਬਾਰਕ ਆਖਾਂਗਾ।

²ਮੈਂ ਹਰ ਰੋਜ਼ ਤੈਨੂੰ ਮੁਬਾਰਕ ਆਖਾਂਗਾ, ਅਤੇ ਮੈਂ ਤੇਰੇ ਨਾਮ ਦੀ ਉਸਤਤ ਸਦਾ ਤੇ ਸਦਾ ਕਰਾਂਗਾ। ³ਸਾਡਾ ਪਿਤਾ ਮਹਾਨ ਹੈ, ਅਤੇ ਅੱਤ ਉਸਤਤ ਜੋਗ ਹੈ; ਉਹ ਦੀ ਮਹਾਨਤਾ ਦੀ ਕੋਈ ਥਾਹ ਨਹੀਂ ਪਾ ਸਕਦਾ।

⁴ਇੱਕ ਪੀੜ੍ਹੀ ਦੂਜੀ ਪੀੜ੍ਹੀ ਅੱਗੇ ਤੇਰੇ ਕੰਮਾਂ ਦੀ ਸ਼ਲਾਘਾ ਕਰੇਗੀ, ਅਤੇ ਤੇਰੇ ਬਲਵਾਨ ਕਾਰਜਾਂ ਦਾ ਵਰਣਨ ਕਰੇਗੀ। ⁵ਮੈਂ ਤੇਰੇ ਪ੍ਰਤਾਪ ਦੀ ਸ਼ਾਨਦਾਰ ਸ਼ੋਭਾ ਉੱਤੇ ਅਤੇ ਤੇਰੇ ਅਚਰਜ ਕੰਮਾਂ ਉੱਤੇ ਧਿਆਨ ਕਰਾਂਗਾ। ⁶ਓਹ ਤੇਰੇ ਭੈ ਭਰੇ ਕੰਮਾਂ ਦੀ ਸਮਰੱਥਾ ਬਾਰੇ ਦੱਸਣਗੇ, ਅਤੇ ਮੈਂ ਤੇਰੀ ਮਹਾਨਤਾ ਦਾ ਪਰਚਾਰ ਕਰਾਂਗਾ। ⁷ਓਹ ਤੇਰੀ ਬਹੁਤੀ ਭਲਿਆਈ ਦੀ ਧੁੰਮ ਨਾਲ ਭਰ ਜਾਣਗੇ, ਅਤੇ ਤੇਰੀ ਧਾਰਮਿਕਤਾ ਦਾ ਖ਼ੁਸ਼ੀ ਨਾਲ ਗੀਤ ਗਾਉਣਗੇ।

⁸ਸਾਡਾ ਪਿਤਾ ਦਿਆਲੂ ਹੈ ਅਤੇ ਤਰਸ ਨਾਲ ਭਰਪੂਰ ਹੈ, ਕ੍ਰੋਧ ਵਿੱਚ ਧੀਮਾ ਅਤੇ ਨੇਮ ਦੇ ਪ੍ਰੇਮ ਵਿੱਚ ਮਹਾਨ ਹੈ। ⁹ਸਾਡਾ ਪਿਤਾ ਸਭਨਾਂ ਲਈ ਭਲਾ ਹੈ, ਅਤੇ ਉਹ ਦਾ ਤਰਸ ਭਰਿਆ ਦਿਲ ਉਹ ਦੇ ਬਣਾਏ ਸਾਰਿਆਂ ਉੱਤੇ ਟਿਕਿਆ ਰਹਿੰਦਾ ਹੈ। ¹⁰ਤੇਰੇ ਸਾਰੇ ਕੰਮ ਤੇਰਾ ਧੰਨਵਾਦ ਕਰਨਗੇ, ਹੇ ਸਾਡੇ ਪਿਤਾ, ਅਤੇ ਤੇਰੇ ਭਗਤ ਤੈਨੂੰ ਮੁਬਾਰਕ ਆਖਣਗੇ। ¹¹ਓਹ ਤੇਰੇ ਰਾਜ ਦੇ ਪਰਤਾਪ ਬਾਰੇ ਬੋਲਣਗੇ ਅਤੇ ਤੇਰੀ ਸਮਰੱਥਾ ਬਾਰੇ ਦੱਸਣਗੇ, ¹²ਤਾਂ ਜੋ ਓਹ ਆਦਮੀ ਦੀ ਸੰਤਾਨ ਨੂੰ ਤੇਰੇ ਬਲਵਾਨ ਕੰਮ ਅਤੇ ਤੇਰੇ ਰਾਜ ਦੀ ਸ਼ਾਨਦਾਰ ਸ਼ੋਭਾ ਦੱਸਣ। ¹³ਤੇਰਾ ਰਾਜ ਸਦੀਪਕ ਰਾਜ ਹੈ, ਅਤੇ ਤੇਰੀ ਪਾਤਸ਼ਾਹੀ ਸਾਰੀਆਂ ਪੀੜ੍ਹੀਆਂ ਤੱਕ ਬਣੀ ਰਹਿੰਦੀ ਹੈ। ਸਾਡਾ ਪਿਤਾ ਆਪਣੇ ਸਾਰੇ ਬਚਨਾਂ ਵਿੱਚ ਵਫ਼ਾਦਾਰ ਹੈ ਅਤੇ ਆਪਣੇ ਸਾਰੇ ਕੰਮਾਂ ਵਿੱਚ ਦਿਆਲੂ ਹੈ। ^a a v13 ਇਹ ਸਤਰ ਬਹੁਤੇ ਇਬਰਾਨੀ ਹੱਥ-ਲਿਖਤਾਂ ਵਿੱਚੋਂ ਗ਼ੈਰ-ਹਾਜ਼ਰ ਹੈ ਪਰ ਮ੍ਰਿਤ ਸਾਗਰ ਪੋਥੀਆਂ ਅਤੇ ਪ੍ਰਾਚੀਨ ਯੂਨਾਨੀ ਵਿੱਚ ਮੌਜੂਦ ਹੈ। ਇਹ ਭਜਨ ਇਬਰਾਨੀ ਵਰਣਮਾਲਾ ਦੇ ਕ੍ਰਮ ਅਨੁਸਾਰ ਚੱਲਦਾ ਹੈ, ਅਤੇ ਇਸ ਸਤਰ ਤੋਂ ਬਿਨਾਂ ਇੱਕ ਅੱਖਰ ਗੁੰਮ ਹੋ ਜਾਂਦਾ ਹੈ।

¹⁴ਸਾਡਾ ਪਿਤਾ ਸਾਰੇ ਡਿੱਗਣ ਵਾਲਿਆਂ ਨੂੰ ਸੰਭਾਲਦਾ ਹੈ, ਅਤੇ ਸਾਰੇ ਝੁਕੇ ਹੋਇਆਂ ਨੂੰ ਉਠਾਉਂਦਾ ਹੈ। ¹⁵ਸਭਨਾਂ ਦੀਆਂ ਅੱਖਾਂ ਤੇਰੇ ਵੱਲ ਤੱਕਦੀਆਂ ਹਨ, ਅਤੇ ਤੂੰ ਉਨ੍ਹਾਂ ਨੂੰ ਵੇਲੇ ਸਿਰ ਉਨ੍ਹਾਂ ਦਾ ਭੋਜਨ ਦਿੰਦਾ ਹੈਂ। ¹⁶ਤੂੰ ਆਪਣਾ ਹੱਥ ਖੋਲ੍ਹਦਾ ਹੈਂ ਅਤੇ ਹਰੇਕ ਜੀਉਂਦੇ ਪ੍ਰਾਣੀ ਦੀ ਇੱਛਾ ਪੂਰੀ ਕਰਦਾ ਹੈਂ।

¹⁷ਸਾਡਾ ਪਿਤਾ ਆਪਣੇ ਸਾਰੇ ਰਾਹਾਂ ਵਿੱਚ ਧਰਮੀ ਹੈ ਅਤੇ ਆਪਣੇ ਸਾਰੇ ਕੰਮਾਂ ਵਿੱਚ ਵਫ਼ਾਦਾਰ ਹੈ। ¹⁸ਸਾਡਾ ਪਿਤਾ ਉਨ੍ਹਾਂ ਸਾਰਿਆਂ ਦੇ ਨੇੜੇ ਹੈ ਜੋ ਉਹ ਨੂੰ ਪੁਕਾਰਦੇ ਹਨ, ਉਨ੍ਹਾਂ ਸਾਰਿਆਂ ਦੇ ਜੋ ਉਹ ਨੂੰ ਸਚਿਆਈ ਨਾਲ ਪੁਕਾਰਦੇ ਹਨ। ¹⁹ਉਹ ਆਪਣੇ ਭੈ ਮੰਨਣ ਵਾਲਿਆਂ ਦੀ ਇੱਛਾ ਪੂਰੀ ਕਰਦਾ ਹੈ; ਉਹ ਉਨ੍ਹਾਂ ਦੀ ਦੁਹਾਈ ਸੁਣਦਾ ਹੈ ਅਤੇ ਉਨ੍ਹਾਂ ਨੂੰ ਬਚਾਉਂਦਾ ਹੈ। ²⁰ਸਾਡਾ ਪਿਤਾ ਆਪਣੇ ਸਾਰੇ ਪ੍ਰੇਮ ਕਰਨ ਵਾਲਿਆਂ ਦੀ ਰਾਖੀ ਕਰਦਾ ਹੈ, ਪਰ ਸਾਰੇ ਦੁਸ਼ਟਾਂ ਦਾ ਉਹ ਨਾਸ ਕਰੇਗਾ।

²¹ਮੇਰਾ ਮੂੰਹ ਸਾਡੇ ਪਿਤਾ ਦੀ ਉਸਤਤ ਬੋਲੇਗਾ; ਹਰੇਕ ਜੀਉਂਦਾ ਪ੍ਰਾਣੀ ਉਹ ਦੇ ਪਵਿੱਤਰ ਨਾਮ ਨੂੰ ਸਦਾ ਤੇ ਸਦਾ ਮੁਬਾਰਕ ਆਖੇ।