መዝሙር 145

145 ¹አባቴ፣ ንጉሤ ሆይ፤ ከፍ ከፍ አደርግሃለሁ፤ ለዘላለም ዘላለሙም ስምህን እባርካለሁ።

²በየዕለቱ እባርክሃለሁ፤ ለዘላለም ዘላለሙም ስምህን አመሰግናለሁ። ³አባታችን ታላቅ ነው፤ እጅግም ሊመሰገን የተገባው ነው፤ ታላቅነቱን ማንም ሊመረምር አይችልም።

⁴አንዱ ትውልድ ለሌላው ትውልድ ሥራህን ያወድሳል፤ ኃያል ሥራዎችህንም ያውጃል። ⁵የግርማህን ክብራማ ድምቀት፣ ድንቅ ሥራዎችህንም አሰላስላለሁ። ⁶የሚያስፈሩ ሥራዎችህን ኃይል ይናገራሉ፤ እኔም ታላቅነትህን አውጃለሁ። ⁷የበዛ ቸርነትህን ዝና አትርፍርፈው ይናገራሉ፤ ጽድቅህንም በደስታ ይዘምራሉ።

⁸አባታችን ቸር ነው፤ ርኅራኄም የመላው ነው፤ ለቍጣ የዘገየ፤ በኪዳን ፍቅሩም ታላቅ ነው። ⁹አባታችን ለሁሉ ቸር ነው፤ የርኅራኄው ልብም በሠራው ፍጥረት ሁሉ ላይ ያርፋል። ¹⁰ሥራዎችህ ሁሉ ያመሰግኑሃል አባታችን ሆይ፤ ታማኞችህም ይባርኩሃል። ¹¹የመንግሥትህን ክብር ይናገራሉ፤ ኃይልህንም ይነግራሉ፤ ¹²ኃያል ሥራዎችህንና የመንግሥትህን ክብራማ ድምቀት ለሰው ልጆች ለማሳወቅ። ¹³መንግሥትህ የዘላለም መንግሥት ነው፤ ግዛትህም በትውልድ ሁሉ ጸንቶ ይኖራል። አባታችን በቃሉ ሁሉ ታማኝ ነው፤ በሥራው ሁሉም ቸር ነው። ^a a v13 ይህ መስመር በአብዛኞቹ የዕብራይስጥ ቅጂዎች ውስጥ የለም፤ ነገር ግን በሙት ባሕር ጥቅልሎችና በጥንታዊው የግሪክ ትርጒም ውስጥ ይገኛል። መዝሙሩ በዕብራይስጥ ፊደላት ቅደም ተከተል የሚሄድ ሲሆን፣ ይህ መስመር ከሌለ አንዱ ፊደል ይጎድላል።

¹⁴አባታችን የሚወድቁትን ሁሉ ይደግፋል፤ የተጎነበሱትንም ሁሉ ቀና ያደርጋል። ¹⁵የሁሉ ዐይኖች ወደ አንተ ይመለከታሉ፤ አንተም ምግባቸውን በየጊዜው ትሰጣቸዋለህ። ¹⁶እጅህን ትከፍታለህ፤ የሕያዋንንም ሁሉ ፍላጎት ታረካለህ።

¹⁷አባታችን በመንገዱ ሁሉ ጻድቅ ነው፤ በሥራው ሁሉም ታማኝ ነው። ¹⁸አባታችን ለሚጠሩት ሁሉ፣ በእውነት ለሚጠሩት ሁሉ ቅርብ ነው። ¹⁹የሚፈሩትን ፍላጎት ይፈጽማል፤ ጩኸታቸውንም ሰምቶ ያድናቸዋል። ²⁰አባታችን የሚወድዱትን ሁሉ ይጠብቃል፤ ክፉዎችን ሁሉ ግን ያጠፋል።

²¹አፌ የአባታችንን ምስጋና ይናገራል፤ ሕያው ፍጡር ሁሉ ቅዱስ ስሙን ለዘላለም ዘላለሙም ይባርክ።