Kwandanyu, Laitoryannyu
Tyendap kalasunet. Ne po Daudi.
Lasunet ne isubu alphayo ne po Daudi ne yeksei: mwachin ibinda age ibinda age poisyonigap Kwandanyi, iame tyong'ik tugul ye yaat eunnyi, ak kinaak tugul che butei. Kimwaei kole tebee rireenennyi che po chamyet eng' tugul che ki toi.
145 1Atoroorin, Kwandanyu, Laitoryannyu, ak aberuur kaineng'ung' koigeny ak koigeny.
2Aberuurin peetuut age tugul, ak alasun kaineng'ung' koigeny ak koigeny. 3Oo Kwandanyo, ak nyoljin kilas miising'; ma imuuch chii konai etunatennyi.
4Mwachin ibinda age ibinda age poisyoniguk, ak komwaita poisyoniguk che kiimeen. 5Abwaatati liilindap telunateng'ung' ne toroor ak poisyoniguk che kikwong'ee. 6Mwaei kimnateetap poisyoniguk che kiywei, ak amwaite etunateng'ung'. 7Mwaei miising' kalasunetap myeeindong'ung' ne chaang', ak kotyen eng' boiboiyet agobo imandang'ung'.
8Kwandanyo ko po myeeindo ak nyiitaat rireenet, ma sip konereechi ak oo rireenennyi. 9Myee Kwandanyo agobo tugul, ak tebee rireenennyi che po chamyet eng' tugul che ki toi. 10Igoochin kongoi poisyoniguk tugul, Kwandanyo, ak kaberuurin piiguk che po iman. 11Mwaei toroornatetap laitornateng'ung' ak komwa kimnateng'ung', 12si kinaak poisyoniguk che kiimeen eng' lagogap kimugulmet, ak liilindap laitornateng'ung' ne toroor. 13Laitornateng'ung' ko laitornatet ne po koigeny, ak tebee pounateng'ung' eng' ibinwek tugul. Po iman Kwandanyo eng' ng'aleekyik tugul ak po myeeindo eng' poisyonikyik tugul. a a v13 Ma mi oldani eng' siirutikap Kiebrani che chaang', ago mi eng' Siirutikap Araroopkap Nyanjet ne Meen ak eng' ng'alekap Kiyunani che po keny. Sip tyendani siruutigap ng'alekap Kiebrani, ak ngot koma mi oldani ko istoi siruutit age.
14Namei Kwandanyo tugul che pureitos, ak koing'eet tugul che kong'uruukso. 15Keerin konyegap tugul inyee, ak igoochin icheek amitwogikwak eng' peetuusyekyik. 16Iyaate eung'ung' ak iyam emosto ne po kiy age tugul ne sabei.
17Po imanda Kwandanyo eng' ortinwekyik tugul ak po iman eng' poisyonikyik tugul. 18Neegit Kwandanyo tugul che guure ineendet, tugul che guure ineendet eng' imanit. 19Yaei emostogap icheeget che konyiti ineendet; kasei kateiyennywa ak kosar icheek. 20Riibe Kwandanyo tugul che chamei ineendet, ago kobar kiptengeginik tugul.
21Mwaei kutinnyu kalasunetap Kwandanyo; ingoberuur kiy age tugul ne sabei kainennyi ne tiliil koigeny ak koigeny.