Haleluya
Amat omang'u pounik, che petos ibwaatutikyik kobooto icheek eng' peetuut ne me icheek. Walutyet ko Kwandanyo, ne kimwaei agobo ne yaei iman: kirwoogutik agobo che kisastae, amdit agobo che amei rubeet, ityach kimonjororinik, riibei toek, kipsiichik ak mosoogik.
146 1Haleluya! Ilasu Kwandanyo, ee saboondanyu.
2Alasun Kwandanyo kota asap; atyenji Kwandanyo kota ami saboondanyu.
3Amat omang'u pounik, anan chiito ne ng'emaksei, ne ma muuchi kosarwok. 4Istoenagei kabuusennyi, koweekyigei ng'wony; eng' peetuunooto petos ibwaatutikyik. 5Poiboi chiito ne toretei Kamuktaindetap Jakobo, ne mang'u Kwandanyo.
6Ineendet ne ki toi kipsengwet ak ng'wony, nyanjet ak tugul che mi eng' icheek; riibei imanda koigeny. 7Yaei kirwoogutik agobo che kisastae; igoochin amdit che amei rubeet. Ityaachin Kwandanyo kimonjororinik. 8Yaatyin Kwandanyo konyegap che koryotiin; ing'eeti Kwandanyo che iming'inotiin; chamei Kwandanyo che po imanda. 9Riibei Kwandanyo toek; toreti ne ma tinyei sigiik ak mosoget, ago ing'emei ooreetap kiptengeginik.
10Laitoran Kwandanyo koigeny— Kwandang'ung', ee Zion, eng' ibinwek tugul. Haleluya!