Aleluya
Lekani kuikha cidikhiro canu kuna madzimambo, akuti pinanyerezera iwo pisafa nawo ntsiku ibodzi-bodzi inafa iwo. Cinango ndi Baba wathu, wakulongwa na pinacita iye kwene-kwene: kulungama kwa ale anapondererwa, pao kwa ale ana njala, akawoko kufungulwa, alendo, anapiye na azimai akufewedwa kusamalirwa.
146 1Aleluya! Simba Baba wathu, moyo wanga.
2Ndinasimba Baba wathu mu umaso wanga wonsene; ndinaimbira Baba wathu mu ndzidzi onsene wakupuma kwanga.
3Lekani kuikha cikhulupiro canu muna atongi, mwa munthu wakufa ule nkhabe kwanisa kukupulumusani. 4Nzimu wace usabuluka, iye asabwerera ku dongo; pa ntsiku ineyi mwene manyerezero ace asamala. 5Wakutsandzaya ndi ule muphedzi wace ndi Mulungu wa Yakobo, ule cidikhiro cace ciri muna Baba wathu.
6Iye ndi Nyakucita kudzulu na dziko yapantsi, bara na pyonsene piri mwenemu; iye asasunga cikhulupiriko kwa muyaya. 7Iye asatonga mwakulungama kuna anyakuthabuswa; iye asapasa nkate kuna anyakubva njala. Baba wathu asatsudzula anyakumangwa. 8Baba wathu asafungula maso a anyakukhonda kuona; Baba wathu asalamusa ale adagodama; Baba wathu asafuna anyakulungama. 9Baba wathu asakoya alendo; iye asaphedza nsiwana na nzice, mbwenye njira ya anyakuipa iye asaifudza.
10Baba wathu anatonga kwa muyaya—Baba wanu, Sioni, kwa mibadwo yonsene. Aleluya!
