Halleluya
Kada ku dogara ga sarakuna, waɗanda shirye-shiryensu suke mutuwa tare da su a ranar da suka mutu. Madadin haka shi ne Ubanmu, wanda aka lissafa ta abin da yake yi a zahiri: adalci ga waɗanda aka zalunta, abinci ga mayunwata, 'yanci ga 'yan kurkuku, kiyaye baƙi, marayu da gwauraye.
146 1Halleluya! Ki yabi Ubanmu, ya raina.
2Zan yabi Ubanmu muddin ina da rai; zan rera waƙa ga Ubanmu muddin ina numfashi.
3Kada ku dogara ga sarakuna, ga mutum mai mutuwa wanda ba zai iya cetonku ba. 4Ruhunsa yakan rabu da shi, yă koma ƙasa; a ranan nan tsare-tsarensa sukan ɓace. 5Mai albarka ne wanda mataimakinsa shi ne Allah na Yakubu, wanda begensa yake ga Ubanmu.
6Shi ne Mahaliccin sama da ƙasa, da teku da dukan abin da yake cikinsu; yana kiyaye aminci har abada. 7Yana shari'ar adalci ga waɗanda ake danniya; yana ba da abinci ga masu yunwa. Ubanmu yana 'yantar da ɗaurarru. 8Ubanmu yana buɗe idanun makafi; Ubanmu yana ɗaga waɗanda aka nawaita wa; Ubanmu yana ƙaunar masu adalci. 9Ubanmu yana lura da baƙi; yana riƙe maraya da gwauruwa, amma hanyar mugaye yana lalata ta.
10Ubanmu zai yi mulki har abada—Ubanki, ya Sihiyona, dukan zamanai. Halleluya!