Ubana, Sarkina

Zabura ta yabo. Ta Dawuda.

Yabon Dawuda bisa jerin baƙaƙe wanda yake ta faɗaɗa: wannan tsara tana yabon ayyukan Ubansa ga tsara mai zuwa, ana ciyar da kowace halitta sa'ad da ya buɗe hannunsa, ana kuma tallafa wa duk mai fāɗuwa. An ce tausayinsa yana bisa kome da ya halitta.

Babi na 145.

Zan ɗaukaka ka, Ubana, Sarkina, zan kuma albarkaci sunanka har abada abadin.

Kowace rana zan albarkace ka, zan kuma yabi sunanka har abada abadin. Ubanmu mai girma ne, ya kuma cancanci yabo ƙwarai; girmansa ba wanda ya isa yă auna.

Tsara za ta yabi ayyukanka ga wata tsara, za su kuma yi shelar manyan ayyukanka. Zan yi tunani a kan darajar ɗaukakar martabarka da kuma ayyukanka masu banmamaki. Za su yi zancen ikon ayyukanka masu ban tsoro, ni kuwa zan yi shelar girmanka. Za su cika da yabon yawan nagartarka, su kuma rera waƙa da farin ciki saboda adalcinka.

Ubanmu mai alheri ne, cike da jinƙai, mai jinkirin fushi da yawan madawwamiyar ƙauna. Ubanmu mai alheri ne ga kowa, jinƙansa kuma yana a kan dukan abin da ya yi. Dukan ayyukanka za su gode maka, Ubanmu, amintattunka kuma za su albarkace ka. Za su yi zancen ɗaukakar mulkinka, su kuma faɗi ikonka, domin a sanar wa mutane manyan ayyukanka, da kuma darajar ɗaukakar mulkinka. Mulkinka madawwamin mulki ne, sarautarka kuma tana nan har tsararraki duka. Ubanmu amintacce ne cikin dukan maganarsa, mai alheri kuma cikin dukan ayyukansa. ^a

Ubanmu yana riƙe dukan masu fāɗuwa, yana kuma tā da dukan waɗanda aka tanƙware. Idanun kowa suna dubanka, kai kuma kana ba su abincinsu a lokacinsa. Kana buɗe hannunka, ka kuma ƙosar da marmarin kowane mai rai.

Ubanmu mai adalci ne cikin dukan hanyoyinsa, amintacce kuma cikin dukan ayyukansa. Ubanmu yana kusa da dukan masu kiransa, da dukan waɗanda suke kiransa da gaskiya. Yana cika marmarin masu tsoronsa; yana jin kukansu, ya kuma cece su. Ubanmu yana kula da dukan masu ƙaunarsa, amma dukan mugaye zai hallaka su.

Bakina zai faɗi yabon Ubanmu; bari kowane mai rai yă albarkaci sunansa mai tsarki har abada abadin.