Zaburi 145

145 ¹ Nitakutukuza wewe, Baba yangu, Mfalme wangu, nami nitalibariki jina lako milele na milele.

² Kila siku nitakubariki wewe, nami nitalisifu jina lako milele na milele. ³ Baba yetu ni mkuu, na anayestahili kusifiwa sana; ukuu wake hakuna awezaye kuupima.

⁴ Kizazi kimoja kitasifia matendo yako kwa kizazi kingine, na kitazitangaza kazi zako zenye nguvu. ⁵ Nitatafakari fahari tukufu ya enzi yako na juu ya matendo yako ya ajabu. ⁶ Watasimulia nguvu za matendo yako ya kutisha, nami nitautangaza ukuu wako. ⁷ Watafurika kwa kumbukumbu ya wema wako mwingi, na wataimba kwa furaha juu ya haki yako.

⁸ Baba yetu ni mwenye neema na amejaa huruma, si mwepesi wa hasira na mkuu katika upendo wa agano. ⁹ Baba yetu ni mwema kwa wote, na moyo wake wa huruma unakaa juu ya vyote alivyovifanya. ¹⁰ Kazi zako zote zitakushukuru, Baba yetu, na waaminifu wako watakubariki. ¹¹ Watanena utukufu wa ufalme wako na kusimulia nguvu zako, ¹² ili kuwajulisha wanadamu matendo yako yenye nguvu, na fahari tukufu ya ufalme wako. ¹³ Ufalme wako ni ufalme wa milele, na mamlaka yako yadumu vizazi vyote. Baba yetu ni mwaminifu katika maneno yake yote, na mwenye neema katika kazi zake zote.

¹⁴ Baba yetu huwategemeza wote wanaoanguka, na huwainua wote walioinama. ¹⁵ Macho ya wote yanatazama kwako wewe, nawe huwapa chakula chao kwa wakati wake. ¹⁶ Waufumbua mkono wako na kuyashibisha matakwa ya kila kilicho hai.

¹⁷ Baba yetu ni mwenye haki katika njia zake zote na mwaminifu katika kazi zake zote. ¹⁸ Baba yetu yu karibu na wote waitao kwake, na wote wamwitao kwa kweli. ¹⁹ Hutimiza matakwa ya wale wamchao yeye; husikia kilio chao, naye huwaokoa. ²⁰ Baba yetu huwalinda wote wampendao yeye, bali waovu wote atawaangamiza.

²¹ Kinywa changu kitanena sifa za Baba yetu; kila kilicho hai na kilibariki jina lake takatifu milele na milele.