Nna m, Eze m
Abụ otuto. Nke Devid.
Otu otuto Devid dị nʼusoro mkpụrụedemede nke na-agbasawanye: otu ọgbọ na-akọrọ ọgbọ nke ọzọ ọrụ Nna ya, a na-enye ihe e kere eke niile nri mgbe o meghere aka ya, a na-ejidekwa onye ọ bụla na-ada ada. E kwuru na obi ebere ya kpuchiri ihe niile o kere.
145 1Aga m ebuli gị elu, Nna m, Eze m, aga m agọzikwa aha gị ruo mgbe ebighị ebi.
2Kwa ụbọchị niile aga m agọzi gị, aga m etokwa aha gị ruo mgbe ebighị ebi. 3Nna anyị dị ukwuu, bụrụkwa onye kwesịrị nnukwu otuto; ịdị ukwuu ya, ọ dịghị onye pụrụ ịghọta.
4Otu ọgbọ ga-agwa ọgbọ ọzọ maka ọrụ gị niile, ha ga-ekwusakwa ọrụ ike gị. 5Aga m atụgharị uche nʼebube dị ebube nke ịdị ukwuu gị na nʼọrụ ebube gị niile. 6Ha ga-akọ maka ike nke ọrụ gị dị egwu, aga m ekwusakwa ịdị ukwuu gị. 7Ha ga-eju afọ nʼaha ọma nke ịdị mma gị bara ụba, were ọṅụ bụọ abụ banyere ezi omume gị.
8Nna anyị bụ onye amara, onye jupụtara nʼọmịiko, onye na-adịghị ewe iwe ọsọọsọ, onye ịhụnanya ọgbụgba ndụ ya dị ukwuu. 9Nna anyị dị mma nʼebe mmadụ niile nọ, obi ọmịiko ya na-adịkwasịkwa nʼelu ihe niile o kere. 10Ọrụ gị niile ga-enye gị ekele, Nna anyị, ndị gị kwesịrị ntụkwasị obi ga-agọzikwa gị. 11Ha ga-ekwu maka ebube nke alaeze gị, kọwaakwa maka ike gị, 12ime ka ụmụ mmadụ mara ọrụ ike gị niile, na ebube dị ebube nke alaeze gị. 13Alaeze gị bụ alaeze ebighị ebi, ọchịchị gị na-adịgidekwa ruo ọgbọ niile. Nna anyị kwesịrị ntụkwasị obi nʼokwu ya niile, na-emekwa amara nʼọrụ ya niile. a a v13 Ahịrị a adịghị nʼọtụtụ ihe odide Hibru, ma ọ dị nʼAkwụkwọ Mpịakọta Osimiri Nwụrụ Anwụ na nʼasụsụ Grik oge ochie. Abụ ọma a na-aga site na mkpụrụedemede Hibru niile, ọ bụrụ na ahịrị a adịghị, otu mkpụrụedemede na-efu.
14Nna anyị na-akwado ndị niile na-ada ada, na-ewelikwa ndị niile hụrụ ala elu. 15Anya mmadụ niile na-ele gị anya, ị na-enyekwa ha nri ha nʼoge ya. 16Ị na-emeghe aka gị, na-emejukwa ọchịchọ nke ihe ọbụla dị ndụ.
17Nna anyị bụ onye ezi omume nʼụzọ ya niile, na-ekwesịkwa ntụkwasị obi nʼọrụ ya niile. 18Nna anyị nọ nso nʼebe ndị niile na-akpọku ya nọ, nʼebe ndị niile ji eziokwu na-akpọku ya nọ. 19Ọ na-emezu ọchịchọ nke ndị na-atụ egwu ya; ọ na-anụ mkpu akwa ha ma zọpụta ha. 20Nna anyị na-echekwa ndị niile hụrụ ya nʼanya, ma ndị ajọ omume niile ka ọ ga-ebibi.
21Ọnụ m ga-ekwu otuto nke Nna anyị; ka ihe ọbụla dị ndụ gọzie aha nsọ ya ruo mgbe ebighị ebi.
