آتام، پادشاهیم
داوودون حمد مزمورو.
داوودون الفبا سیراسی ائله گِنئشلَنَن بئر حمدی: بئر نسئل آتاسینین ائشلرئنی آیری نسله مدح ادر، اَلئنی آچاندا هر مخلوق دویور، و ییخیلان هر کس قالدیریلیر. اونون مرحمتی یاراتدیغی هر شیئن اوستونده‌دئر دئیئلئر.
145 1سنی اوجالداجاغام، ای آتام، ای پادشاهیم، و آدینا ابددن ابده‌جک حمد اده‌جه‌یم.
2هر گون سنه حمد اده‌جه‌یم و آدینی ابددن ابده‌جک مدح اده‌جه‌یم. 3آتامیز بؤیوکدور و حمدلره لایئقدئر؛ عظمتئنی هچ کس درک اده بئلمز.
4بئر نسئل آیری بئر نسله سنئن ائشلرئنی مدح اده‌جک و قودرتلی عمللرئنی اعلان اده‌جک. 5عظمتئنئن شؤوکتلی جلالی و عجایئب ائشلرئن اوستونده درئن دوشونه‌جه‌یم. 6زهملی عمل‌لرئنئن قووّتئندن دانیشاجاقلار، و من سنئن عظمتئنی اعلان اده‌جه‌یم. 7سنئن بول یاخشیلیغینین شؤهره‌تئنی جوشغونلوقلا بیان اده‌جکلر، و صالحلئیئنی شادلیقلا اوخویاجاقلار.
8آتامیز فیضلی و مرحمتله دولودور، حدسئز صبئرلی‌دئر و محبّتی چوخدور. 9آتامیز هامییا یاخشی‌دیر، و مرحمتی یاراتدیغی بوتون شیلرئن اوستونده‌دئر. 10بوتون ائشلرئن سنه شوکور اده‌جک، ای آتامیز، و وفالی‌لارین سنه حمد اده‌جکلر. 11پادشاهلیغینین جلالیندان دانیشاجاقلار و قدرتئنی بیان اده‌جکلر، 12قودرتلی عمللرئنی ائنسان اؤولادلارینا و پادشاهلیغینین شؤوکتلی جلالینی بئلدئرمک اوچون. 13پادشاهلیغین ابدی بئر پادشاهلیقدیر و حؤکمرانلیغین بوتون نسئل‌لر بویو داوام ادر. آتامیز بوتون سؤزلرئنده وفالی‌دیر و بوتون ائشلرئنده مهرئباندیر. a a v13 بو سطر عئبری اَل‌یازمالارینین چوخوندا یوخدور، آمّا اؤلو دهنز طومارلاریندا و قدئم یونانجادا واردیر. بو مزمور عئبری الیفباسینی باشدان-باشا گدئر، و بو سطر اولمادان بئر حرف اَسکئک قالیر.
14آتامیز ییخیلان هر کسی ساخلاییر و اَیئلن هر کسی قالدیریر. 15هامینین گؤزلری سنه باخیر، و سن ده اونلارا یمکلرئنی اؤز واختیندا ورئرسن. 16سن اَلئنی آچیرسان و هر جانلینین آرزوسونو دویدورورسان.
17آتامیز بوتون یوللاریندا صالحدئر و بوتون ائشلرئنده وفالی‌دیر. 18آتامیز اونو چاغیران هر کسه، اونو حقئقتله چاغیران هر کسه یاخیندیر. 19اوندان قورخانلارین آرزوسونو یرئنه یتئرئر؛ فریادلارینی اشئدئر و اونلاری خئلاص ادر. 20آتامیز اونو سِوَن هر کسی قورویور، آمّا بوتون پئس آداملاری محو اده‌جک.
21آغزیم آتامیزین حمدئنی بیان اده‌جک؛ قوی هر جانلی اونون موقدّس آدینا ابددن ابده‌جک حمد اتسئن.
