Tata ya munu, Ntinu ya munu
Nkunga ya lukembilu. Nkunga ya Davidi.
Lukembilu ya baleta ya Davidi yina ke kula kaka: mbandu mosi ke kembila bisalu ya Tata ya beto na mbandu ya nkaka, konso kima ya moyo ke baka madya ntangu yandi ke kangula diboko ya yandi, mpe konso muntu yina ke bwa, ba ke telemisa yandi. Ba ke tuba ti kyadi ya yandi ke vwandaka na zulu ya bima nyonso yina yandi me sala.
145 1Mu ke zangula nge, Tata ya munu, Ntinu ya munu, mpe mu ke sakumuna nkumbu ya nge seko na seko.
2Konso kilumbu mu ke sakumuna nge, mpe mu ke kembila nkumbu ya nge seko na seko. 3Tata ya beto kele ya nene, mpe yandi fwana mingi na lukembilu; bunene ya yandi, ata muntu lenda zaba yawu ve.
4Mbandu mosi ke kembila bisalu ya nge na mbandu ya nkaka, mpe ke zonza mambu ya ngolo ya nge. 5Mu ke yindula na ntima nkembo ya kitoko ya bunene ya nge mpe bisalu ya nge ya ngitukulu. 6Bawu ke zonza ngolo ya mambu ya nge ya nsisi, mpe mu ke samuna bunene ya nge. 7Bawu ke fuluka na nsangu ya bumbote ya nge ya mingi, mpe bawu ke yimbila na kyese mambu ya kudedama ya nge.
8Tata ya beto ke lemvokilaka mpe me fuluka na kyadi, yandi ke dasukaka na mbangu ve mpe kele ya nene na luzolo ya ngwisani. 9Tata ya beto kele mbote na bantu nyonso, mpe ntima ya yandi ya kyadi ke vwandaka na zulu ya bima nyonso yina yandi me sala. 10Bisalu ya nge nyonso ke tonda nge, Tata ya beto, mpe bantu ya nge ya kukwikama ke sakumuna nge. 11Bawu ke zonza nkembo ya Kimfumu ya nge mpe ke tuba ngolo ya nge, 12samu na kuzabisa mambu ya ngolo ya nge na bana ya bantu, mpe nkembo ya kitoko ya Kimfumu ya nge. 13Kimfumu ya nge kele Kimfumu ya seko, mpe luyalu ya nge ke zingaka na mbandu nyonso. Tata ya beto kele ya kukwikama na mambu ya yandi nyonso mpe ke lemvokilaka na bisalu ya yandi nyonso. a a v13 Molongo yayi kele ve na mikanda mingi ya ki-Ebreo, kasi yawu kele na Minkanda ya Mubu ya Fwa mpe na ki-Greke ya ntama. Nkunga yayi ke landaka baleta ya ki-Ebreo, mpe kana molongo yayi kele ve, leta mosi ke konda.
14Tata ya beto ke simbaka bantu nyonso yina ke bwa, mpe ke telemisaka bantu nyonso yina me bwa na ntoto. 15Meso ya bantu nyonso ke talaka nge, mpe nge ke pesaka bawu madya ya bawu na ntangu ya yawu. 16Nge ke kangulaka diboko ya nge mpe ke yukutisaka nsatu ya kima nyonso ya moyo.
17Tata ya beto kele ya kudedama na banzila ya yandi nyonso mpe ya kukwikama na bisalu ya yandi nyonso. 18Tata ya beto kele pene-pene na bantu nyonso yina ke bokila yandi, na bantu nyonso yina ke bokila yandi na butsyelika. 19Yandi ke lungisaka nsatu ya bayina ke zitisaka yandi; yandi ke kuwaka kulooka ya bawu mpe ke vuukisaka bawu. 20Tata ya beto ke kebaka bantu nyonso yina ke zola yandi, kasi bantu ya yimbi nyonso yandi ke zimbisa bawu.
21Yinwa ya munu ke zonza lukembilu ya Tata ya beto; bika ti kima nyonso ya moyo kusakumuna nkumbu ya yandi ya longo seko na seko.