Hallelujah
Wungnaobingli naning mahorsangalu; athumna thikahai ngashun chili athumwui ningkachāng ngasoda thihaora. Chiwui mangāli ithumwui Avā lei, ana sākahai otsak eina ngahāngkhui: rekharek kahaibingwui vang mashun athut, kathaibingli kashakazā, narkahaibingli ningkhān, kha̱mi, marānao kala ra̱meinaobingli singkhāng.
146 1Hallelujah! Ithumwui Avāli solu, O imanglā!
2I ringlakha eina tangda ithumwui Avāli ina masot chigatra; I leilakha eina tangda ithumwui Avāli ina laa sāra.
3Wungnaobingli, nali huimi khavai makhalei mi akhali naning mahorsangalu. 4Awui manglā thuira, ana ngaleili latungra; chithang ngalāngda awui khangarān shimānhaora. 5Awui ngachonkhame Jacobwui Vare kasā, kala awui kachihān ithumwui Avāli kapama mi chi ka̱lā mahai.
6Ana kazing eina ngalei, shamadru, kala chibingwui alungli khalei saikora kasaana; ana ningkatong katang mavaila mayonchinga. 7Rekharek kahaibingwui vang ana mashun athut hāngsangmi; kathaibingli ana kashakazā mi. Ithumwui Avāna narkahaibingli ningkhān ngasaka. 8Ithumwui Avāna mik khangapeobingli mik rakngasaka; Ithumwui Avāna ngakhumsang kahaibingli khāngmathotmi; Ithumwui Avāna khamashungbingli leishiya. 9Ithumwui Avāna kha̱mibingli ngākmi; ana marānao kala ra̱meinaoli singkhāngmi, kha makhayāwui apongli ana shimān ngasaka.
10Ithumwui Avāna, O Zion, nawui Avāna thot saikorali katang mavaila mungra. Hallelujah!
