Haleluya
Ntukiringire abategetsi, abo imigambi yabo irimbukana na bo uwo munsi bapfa. Ahubwo hari Data wa twese, ubarwa ku byo akora koko: arenganura abakandamizwa, agaha abashonji umugati, agakiza imfungwa, akarinda abanyamahanga, impfubyi n'abapfakazi.
146 1Haleluya! Singiza Data wa twese, wowe mutima wanjye.
2Nzasingiza Data wa twese mu buzima bwanjye bwose; nzaririmbira Data wa twese igihe cyose nzaba nkihumeka.
3Ntukiringire abategetsi, cyangwa umuntu upfa udashobora kugukiza. 4Umwuka we urasohoka, agasubira mu butaka; uwo munsi nyirizina imigambi ye ikarimbuka. 5Hahirwa uwo umufasha we ari Imana ya Yakobo, uwiringiye Data wa twese.
6Ni we waremye ijuru n'isi, inyanja n'ibibirimo byose; ahorana umurava iteka ryose. 7Arenganura abakandamizwa; aha abashonji umugati. Data wa twese abohora imfungwa. 8Data wa twese ahumura impumyi; Data wa twese aterura abaremerewe; Data wa twese akunda abakiranutsi. 9Data wa twese arinda abanyamahanga; ashyigikira impfubyi n'umupfakazi, ariko inzira y'abagome arayirimbura.
10Data wa twese azaganza iteka ryose; wowe Siyoni, So azaganza mu bisekuruza byose. Haleluya!
