Aleluya
Kotia elikya na bakonzi te, oyo mikano na bango ekufaka elongo na bango na mokolo moko. Eloko mosusu ezali Tata na biso, oyo ayebisami na oyo asalaka: bosembo mpo na batindikami, limpa mpo na bayokaka nzala, bakangami bafungolami, bapaya, bana ya bobola mpe basi akufelaki mibali babatelami.
146 1Aleluya ! Kumisa Tata na biso, molimo na ngai.
2Nakokumisa Tata na biso tango nazali na bomoi ; nakoyemba mpo na Tata na biso tii tango nazali kopema.
3Kotia elikya na yo te na bakonzi, na moto akufaka oyo akoki kobikisa yo te. 4Molimo na ye ekei, azongi na mabele ; mokolo yango moko makanisi na ye mabungi. 5Azali na esengo moto oyo Nzambe ya Yakobo azali mosungi na ye, oyo elikya na ye ezali na Tata na biso.
6Ye nde Mokeli ya likolo mpe ya mabele, ya mbu mpe ya biloko nyonso oyo ezali kati na yango ; abatelaka bosolo libela. 7Asalaka bosembo mpo na bato oyo banyokolami ; apesaka limpa na bato oyo nzala ezali koboma. Tata na biso afungolaka bakangami. 8Tata na biso afungolaka miso ya bakufi miso ; Tata na biso atombolaka bato oyo bagumbami ; Tata na biso alingaka bato ya bosembo. 9Tata na biso abatelaka bapaya ; asungaka mwana oyo azangi tata mpe mwasi oyo mobali na ye akufa, kasi abebisaka nzela ya bato mabe.
10Tata na biso akokonza libela, Siona— Tata na yo, kino na mibotama nyonso. Aleluya !
