Haleluya
Ndũkeehoke anene, arĩa mataaro mao mathiranaga o mũthenya ũrĩa makuaga. Handũ ha ũguo nĩ Ithe witũ, ũrĩa ũgwetetwo nĩ ũndũ wa ũrĩa ekaga: kĩhooto kũrĩ arĩa mahinyĩrĩirio, irio kũrĩ arĩa ahũtu, arĩa moohetwo makoohorwo, ageni, ciana cia ntigaana na atumia a ndigwa makarangĩrwo.
146 1Haleluya! Gooca Ithe witũ, wee ngoro yakwa.
2Nĩngũgooca Ithe witũ hĩndĩ ĩrĩa yothe ndĩrĩ muoyo; nĩngũinĩra Ithe witũ o rĩrĩa ngũtũũra na mĩhũmũ.
3Mũtige kwĩhoka anene, o na mũndũ, ũrĩa ũtangĩhota kũmũhonokia. 4Roho wake nĩuumagĩra, agacooka tĩĩriinĩ; mũthenya o ũcio mĩbango yake nĩĩthiraga. 5Kũraathimwo nĩ mũndũ ũrĩa mũteithia wake arĩ Ngai wa Jakubu, ũrĩa mwĩhoko wake ũrĩ harĩ Ithe witũ.
6Nĩ we wombire igũrũ na thĩ, o na iria na indo ciothe irĩ thĩinĩ wacio; nĩatũũragia wĩhokeku nginya tene. 7Nĩaciirĩragĩra arĩa ahiinyĩrĩrie; nĩaheaga arĩa ahũtu irio. Ithe witũ nĩohoraga arĩa oohe njeera. 8Ithe witũ nĩahingũraga maitho ma arĩa atumumu; Ithe witũ nĩambararagia arĩa mainamĩrĩrie; Ithe witũ nĩendaga arĩa athingu. 9Ithe witũ nĩamenyagĩrĩra ageni; nĩatiiragĩrĩra mwana wa ngoriai na mũtumia wa ndigwa, no njĩra ya arĩa aaganu nĩamĩthũkagia.
10Ithe witũ nĩagaathamaka nginya tene—Ithe waku, wee Zayuni, njiarwa na njiarwa ciothe. Haleluya!