Haleluyah
Ẹ má ṣe gbẹ́kẹ̀lé àwọn ọmọ aládé, nítorí ọjọ́ tí wọ́n bá kú ni èrò wọn ń kú pẹ̀lú wọn. Dípò wọn, Baba wa wà, a sì ka ohun tí ó ń ṣe ní tòótọ́: ó ń ṣe ìdájọ́ òdodo fún àwọn tí a ni lára, ó ń fún àwọn tí ebi ń pa ní oúnjẹ, ó ń tú àwọn ẹlẹ́wọ̀n sílẹ̀, ó sì ń pa àwọn àjèjì, àwọn ọmọ òrukàn àti àwọn opó mọ́.
146 1Haleluyah! Yìn Baba wa, ọkàn mi.
2Èmi yóò yin Baba wa níwọ̀n ìgbà tí mo bá wà láàyè; èmi yóò kọrin sí Baba wa níwọ̀n ìgbà tí mo bá ń mí.
3Ẹ má ṣe gbẹ́kẹ̀lé àwọn ọmọ-aládé, nínú ẹni kíkú tí kò lè gbà yín là. 4Ẹ̀mí rẹ̀ a bọ́ lọ, ó sì padà sí erùpẹ̀; ní ọjọ́ náà gan-an ni àwọn ète rẹ̀ ń ṣègbé. 5Aláyọ̀ ni ẹni tí olùrànlọ́wọ́ rẹ̀ jẹ́ Ọlọ́run Jakọbu, tí ìrètí rẹ̀ sì wà nínú Baba wa.
6Òun ni Ẹlẹ́dàá ọ̀run àti ayé, òkun àti ohun gbogbo tí ń bẹ nínú wọn; ó ń pa òtítọ́ mọ́ títí láé. 7Ó ń ṣe ìdájọ́ òdodo fún àwọn tí a ń ni lára; ó ń fi oúnjẹ fún àwọn tí ebi ń pa. Baba wa ń dá àwọn ẹlẹ́wọ̀n sílẹ̀. 8Baba wa ń là ojú àwọn afọ́jú; Baba wa ń gbé àwọn tí a tẹ̀ mọ́lẹ̀ dìde; Baba wa fẹ́ràn àwọn olódodo. 9Baba wa ń ṣọ́ àwọn àjèjì; ó ń gbé ọmọ òrukàn àti opó ró, ṣùgbọ́n ó ń sọ ọ̀nà àwọn ìkà di ìparun.
10Baba wa yóò jọba títí láé—Baba rẹ, ìwọ Sioni, láti ìran dé ìran. Haleluyah!
