Halleluiya
Krwang sa nun khou nani bachunnu thang mako, bani om baningnu nun ga bani thinu ni takka braanlune. Pi thang damnu ga ani Pa gaye: bangiamtanu nun ding ririaknu, hung nunlang buh, qwan in mi nun ding rangnu, man mi nun, pa maknu sa khatle tamei nun ding Maanna sui thang nge.
146 1Halleluiya! Akatha na, ani Pa ding swankawo.
2Ei ringga ong basaan Eina ani Pa ding swankalune; ei ring ongnu basaan ani Pa ding laa tolune.
3Krwang sa nun khou balumsa mako, nani ding kan thang ngam maknu thi zanu mi khou le balumsa mako. 4Bakatha swak nge, maan talei bi han late; haba ni takka baom baningnu nun braanlune. 5Jacob om Rikrwang ding baom paangthangnupa amnu khatle ani Pa khou bachunnu amnu mi ga aih sanuwe.
6Maan tambaan khatle talei ram, tuipui khatle habei ga amnu brumza dam thangnu gaye; Maanna khwa seiga balumsa lang khopnu ding zeiye. 7Maanna thot pi rai ongnu nun lang bazenu chongsem kasem thang nge; chaamnu nun ding uilu pi thang nge. Ani Pa na qwan in mi nun ding rang pi to thang nge. 8Ani Pa na mik chonu nun om mik pi mu thang nge; ani Pa na bangiamtanu nun ding pi basaang ka thang nge; ani Pa na ririak senu nun ding kriang nge. 9Ani Pa na man mi nun ding paang thang nge; Maanna pa maknu sa khatle tamei ding sui thang nge, atiyeda kasianu nun om lampui ding Maanna braan thang nge.
10Ani Pa na khwa seiga paanlune— he Zion, Na Pa na mikin bing bi khwa seiga paanlune. Halleluiya!