Halleluya
Raja laga betakhan uporte tumi laga asha narakhibi, kelemane taikhan mora din te taikhan laga bisar bhi mori jai. Itu laga bodli te amikhan laga Pitri ase, Tai asol te ki kore itu pora gina: dukh dibo thaka manuh karne nyay, bhuk thaka manuh karne roti, bondi khan ke mukti, aru bidexi, anath aru bidhwa khan ke rakhi diye.
146 1Halleluya! Moi laga pran, amar Pitri ke stuti koribi.
2Moi jiise tak amar Pitri ke stuti koribo; moi saas thaka tak amar Pitri ke git gaibo.
3Rajkumar khan ke biswas nakoribi, kun tumike bachabo napare, eneka mora-manuh ke bhi nohoi. 4Tar pran ulai jai, tai matite wapas jai; thik hei din te tar laga bhabona khan khotom hoi jai. 5Dhonno ase etu manuh, kun laga sahayokari Jacob laga Isor ase, aru kun laga asha amar Pitri te ase.
6Tai sorgo aru prithibi, samundar aru taikhan bhitor te thaka sob saman banowa jon ase; tai hodai tak hosa rakhe. 7Dukh-digdar pa manuh khan ke tai niyai di diye; bhuk laga manuh khan ke tai ruti diye. Amar Pitri pora bondi te thaka manuh khan ke chari diye. 8Amar Pitri pora andha manuh khan laga suku khuli diye; amar Pitri pora niche jhuki thaka khan ke uthai diye; amar Pitri pora dharmik manuh khan ke morom kore. 9Amar Pitri pora bidexi manuh khan ke sa-sa rakhe; tai anath aru bidhowa ke dhori rakhe, kintu paapi manuh khan laga rasta tu tai nosto kori diye.
10Amar Pitri hodai tak raj koribo—tumar Pitri, O Zion, jug-jug tak. Halleluya!