Stuti Gana Kora Kiman Bhal Ase

Amikhan laga Pitri tara khan ke gine aru ekta-ekta ke nam di diye, aru mon bhangi thaka manuh khan ke bhi bandhi diye; Tai borof aru shil pathai, titia Tai laga kotha pathai jun pora itu goli jai. Tai ke khushi diya jinis ghora laga takot nohoi, manuh laga sakti bhi nohoi, kintu Tai laga morom uporte asha rakha manuh khan ase.

Adhyay 147.

Hallelujah! Amar Pitri ke stuti gana kora kiman bhal ase; Tar ke mohima kora kiman anondo aru thik ase.

Amar Pitri pora Jerusalem ke tyar kori ase; sitaikena thaka Israel laga manuh khan ke Tar pora joma kori ase. Mon bhanga manuh khan ke Tar pora bhal kori di ase aru tarkhan laga ghao khan ke bandi di ase. Tara khan ke Tar pora ginti kori ase; ekjon ekjon ke tarkhan laga nam pora mati ase. Amar Raja Pitri dangor ase, aru Tar sakti bisi bol ase; Tar buddhi tu nap koribo napare. Amar Pitri pora nomro manuh khan ke uthai di ase; biya manuh khan ke matite phelai di ase.

Amar Pitri ke dhanyavad logot gana koribi; Tar karne beena bojai dibi. Akas ke badal pora dhaki di ase; prithibi te borkhon pathai di ase; pahar khan te ghas gojai di ase. Janwar khan ke tarkhan laga khana Tar pora di ase, aru kandi thaka kaua laga bacha khan ke bhi di ase. Ghora laga takot te Tar khushi nai, aru manuh laga theng te bhi Tar anondo nai. Kun manuh Tar ke bhoi kore, Tar vachan laga morom te asha rakhe, eneka manuh khan te amar Pitri laga mon khushi hoi.

He Jerusalem, amar Pitri ke mohima koribi! He Zion, tumar Pitri ke mohima koribi! Kilemane tumar duar laga agal khan ke Tar pora mojbut kori di ase; tumar deewal laga bhitor te tumar bacha khan ke asirbad di ase. Tumar simana khan te shanti ani di ase; sob se bhal gehu pora tumi ke bhorti kori di ase. Prithibi te Tar hukum pathai di ase; Tar kotha joldi polai jai. Bheda laga suta nisina borop di ase; chai nisina him sitai di ase. Tukra tukra nisina Tar borop laga pathor phelai di ase; Tar thanda age te kun khara koribo pare? Tar kotha pathai kene borop ke golai di ase; Tar hawa bohai di ase, aru pani khan boi jai. Jacob ke Tar kotha janai di ase, Israel ke Tar niyom aru bisar khan janai di ase. Dusra kun desh karne bhi eneka kora nai; tarkhan Tar bisar khan najane. Hallelujah!