சங்கீதம் 147

147 ¹ அல்லேலூயா! எங்கள் பிதாவைத் துதித்துப் பாடுவது எத்தனை நன்று; அவரைத் துதிப்பது எத்தனை இன்பமும் ஏற்றதுமாயிருக்கிறது.

² எங்கள் பிதா எருசலேமைக் கட்டியெழுப்புகிறார்; சிதறடிக்கப்பட்ட இஸ்ரவேல் மக்களைச் சேர்த்துக்கொள்ளுகிறார். ³ நொறுங்குண்ட இருதயமுள்ளவர்களைக் குணமாக்குகிறார் அவர்களுடைய காயங்களைக் கட்டுகிறார். ⁴ அவர் நட்சத்திரங்களை எண்ணுகிறார்; அவைகள் ஒவ்வொன்றையும் பேர்சொல்லி அழைக்கிறார். ⁵ எங்கள் ஆண்டவராகிய பிதா மகத்துவமுள்ளவர், வல்லமையில் பராக்கிரமமுள்ளவர்; அவருடைய அறிவு அளவிடற்கரியது. ⁶ எங்கள் பிதா தாழ்மையுள்ளவர்களை உயர்த்துகிறார்; துன்மார்க்கரைத் தரைமட்டும் தள்ளிப்போடுகிறார்.

⁷ எங்கள் பிதாவுக்கு ஸ்தோத்திரத்தோடே பாடுங்கள்; சுரமண்டலத்தினால் அவருக்கு இசை எழுப்புங்கள். ⁸ அவர் வானத்தை மேகங்களால் மூடுகிறார்; பூமிக்கு மழையை அனுப்புகிறார்; மலைகளில் புல்லை முளைக்கப்பண்ணுகிறார். ⁹ அவர் மிருகங்களுக்கு அவைகளின் ஆகாரத்தைக் கொடுக்கிறார், கூப்பிடுகிற காக்கைக் குஞ்சுகளுக்கும் கொடுக்கிறார். ¹⁰ குதிரையின் பலத்தில் அவருக்குப் பிரியமில்லை, மனிதனுடைய கால்களில் அவருக்கு விருப்பமுமில்லை. ¹¹ எங்கள் பிதாவின் இருதயம் தமக்குப் பயந்து நடக்கிறவர்களிடத்திலும், அவருடைய உடன்படிக்கை அன்பின்மேல் நம்பிக்கையாயிருக்கிறவர்களிடத்திலும் பிரியப்படுகிறது.

¹² எருசலேமே, எங்கள் பிதாவைத் துதி! சீயோனே, உன் பிதாவைத் துதி! ¹³ அவர் உன் வாசல்களின் தாழ்ப்பாள்களை உறுதிப்படுத்துகிறார்; உன் மதில்களுக்குள் உன் பிள்ளைகளை ஆசீர்வதிக்கிறார். ¹⁴ அவர் உன் எல்லைகளுக்குச் சமாதானத்தைத் தருகிறார்; உச்சிதமான கோதுமையினால் உன்னைத் திருப்தியாக்குகிறார். ¹⁵ அவர் தமது கட்டளையைப் பூமிக்கு அனுப்புகிறார்; அவருடைய வார்த்தை மிக வேகமாய் ஓடுகிறது. ¹⁶ அவர் ஆட்டுமயிரைப்போல உறைந்த மழையைத் தருகிறார்; சாம்பலைப்போல உறைபனியைத் தூவுகிறார். ¹⁷ அவர் தமது கல்மழையைத் துணிக்கைகளைப்போல எறிகிறார்; அவருடைய குளிருக்கு முன்பாக நிற்கத்தக்கவன் யார்? ¹⁸ அவர் தமது வார்த்தையை அனுப்பி, உறைந்ததை உருகப்பண்ணுகிறார்; தமது காற்றை வீசப்பண்ணுகிறார், அப்பொழுது தண்ணீர்கள் ஓடுகின்றன. ¹⁹ அவர் தமது வார்த்தையை யாக்கோபுக்கு அறிவிக்கிறார், தமது பிரமாணங்களையும் நியாயங்களையும் இஸ்ரவேலுக்கு அறிவிக்கிறார். ²⁰ வேறொரு ஜாதிக்கும் அவர் இப்படிச் செய்யவில்லை; அவருடைய நியாயங்களை அவர்கள் அறியார்கள். அல்லேலூயா!