சங்கீதம் 148

148 ¹ அல்லேலூயா! வானங்களிலிருந்து எங்கள் பிதாவைத் துதியுங்கள்; உன்னதங்களில் அவரைத் துதியுங்கள். ² அவருடைய தூதர்களே, நீங்கள் எல்லாரும் அவரைத் துதியுங்கள்; அவருடைய சேனைகளே, நீங்கள் எல்லாரும் அவரைத் துதியுங்கள். ³ சூரியனே, சந்திரனே, அவரைத் துதியுங்கள்; பிரகாசிக்கும் எல்லா நட்சத்திரங்களே, அவரைத் துதியுங்கள். ⁴ மகா உன்னதமான வானங்களே, அவரைத் துதியுங்கள், வானங்களுக்கு மேலான ஜலங்களே, அவரைத் துதியுங்கள். ⁵ அவைகள் எங்கள் பிதாவின் நாமத்தைத் துதிக்கக்கடவது, ஏனெனில் அவர் கட்டளையிட, அவைகள் சிருஷ்டிக்கப்பட்டன. ⁶ அவர் அவைகளை என்றென்றைக்கும் நிலைநிறுத்தினார்; ஒழிந்துபோகாத ஒரு கட்டளையை அவர் கொடுத்தார்.

⁷ பூமியிலிருந்து எங்கள் பிதாவைத் துதியுங்கள், கடல் ஜந்துக்களே, எல்லா ஆழங்களே, ⁸ அக்கினியே, கல்மழையே, உறைந்த மழையே, மூடுபனியே, அவருடைய வார்த்தையை நிறைவேற்றும் புசல்காற்றே, ⁹ மலைகளே, எல்லா குன்றுகளே, கனிதரும் மரங்களே, எல்லா கேதுரு மரங்களே, ¹⁰ காட்டு மிருகங்களே, எல்லா நாட்டு மிருகங்களே, ஊரும் பிராணிகளே, பறக்கும் பட்சிகளே, ¹¹ பூமியின் ராஜாக்களே, எல்லா ஜனங்களே, பிரபுக்களே, பூமியின் எல்லா அதிபதிகளே, ¹² வாலிபரே, கன்னிகைகளே, முதியோரே, பிள்ளைகளே, நீங்கள் யாவரும் அவரைத் துதியுங்கள்.

¹³ அவைகள் எங்கள் பிதாவின் நாமத்தைத் துதிக்கக்கடவது, ஏனெனில் அவருடைய நாமம் மாத்திரமே உன்னதமானது; அவருடைய மகிமை பூமிக்கும் வானத்திற்கும் மேலானது. ¹⁴ அவர் தம்முடைய ஜனத்திற்கு வல்லமையை உயர்த்தினார், தம்முடைய பக்தர்கள் அனைவருக்கும் துதியை, தமக்கு அண்மையிலிருக்கும் இஸ்ரவேல் ஜனத்திற்கே துதியை உயர்த்தினார். அல்லேலூயா!