Laa 147

147 ¹Proholi solu! Ithumwui Avāli masotlaa sāda kayākha kaphāhaikhala; ali masot mi hi kayākha ringphā kala achamhaikhala.

²Ithumwui Avāna Jerusalemli sakāmi; ana Israelwui ngapha̱ kahai mibingli kazipkhui. ³Ana malung sipkasābingli raimi kala athumwui khamāli rommi. ⁴Ana sirābingli mashing shānkhui; ana athumli ichichāwui aming eina hoi. ⁵Ithumwui Avā chi reikhamataina, kala pangshapana yāng kālaka; awui theishingkakhui chotman maleimana. ⁶Ithumwui Avāna khanimbingli khāngkhui; ana makhayābingli ngaleili saosang.

⁷Ithumwui Avāli ningkashi eina laa sālu; ali lyre eina masotlaa sālu. ⁸Ana kazingramli muiyā eina fakham; ana okathuili kazing romi; ana phungrābingli khawo kharngasaka. ⁹Ana sāyurbingli azāt mi, kala ngakao tharan ngahong-hangkhānaobinglila mi. ¹⁰Ana sigui pangshapli ringphā maleimana, lah miwui pheili ana ningyāng khaung maleimana. ¹¹Ithumwui Avāna ali khangacheebingli, awui makhangachei leikashili kachihānbinglila ningyāng unga.

¹²Ithumwui Avāli sochikatlu, O Jerusalem! Nawui Avāli sochikatlu, O Zion! ¹³Kaja ana nawui ngaveiwui phākashut yāng kāngasaka; ana nawui keinunglungli nawui naongarāli somi. ¹⁴Ana nawui tharili chingrihai ngasaka; ana nali mathāmeikap kaje kehu eina pemngasaka. ¹⁵Ana awui ningkhamili okathuili chihovā; awui tui ngalāngda thaklāk eina yāma. ¹⁶Ana horāmli sahā thāda mi; ana phāmli hotlā thāda khayinmi. ¹⁷Ana awui ngahongli zātpā thāda hortā; awui khamakuiwui mangāli khipāna nganingpama? ¹⁸Ana awui tui chihorāra kala phāmkok mengngasaka; ana awui masi phanngasaka, kala tara̱ longra. ¹⁹Ana awui tui Jacobli, kala awui ain eina shiyan-chikan Israelli hāngchitheira. ²⁰Ana kachikathā yur khangatei akhawui vang hikathā masāmana; athumna awui shiyan-chikan matheimana. Proholi solu!