Sākahai Ot Saikora, Ali Sochikatlu
Atungthungwui eina ayarli sochikat khavai ming hokhui: kazingraobing, zimik kala kachāng, chithāda shamadruwui sāyurbing, kazing, phungrei, thingrong, sāyurbing, awungabing kala naongarābing. Ming kahoa saikora tui kachihorā eina sākahaina, kala saikorana aming akhamāng eina ngahāngmi khavai: ithumwui Avā.
148 1Hallelujah! Kazingram eina ithumwui Avāli sochikatlu; kajuipamli ali sochikatlu. 2Ali sochikatlu, awui kazingraobing saikora; ali sochikatlu, awui ashangva̱ saikora. 3Zimik kala kachāng, ali sochikatlu; O kahor kakā sirā saikora, ali sochikatlu. 4Ali sochikatlu, O kazingramwui kazingram, kala O kazingram atungli khalei tara̱bing. 5Athumna ithumwui Avāwui mingli sochikatranu, kaja ana kasoi, kala athum sākhui ngasaka. 6Ana athumli mashimānda mashimānla sakā ngasaka; makānthu khavai shiyan akha ana mi.
7Okathui eina ithumwui Avāli sochikatlu, O shamadruwui manglākapai yurbing kala kathukthuk saikora, 8mei kala theih, horam kala leichui, awui tui ungshung khame siphan zingrot, 9kaphung kala phungrā saikora, athei kakā thingrong kala cedarthing saikora, 10ramsā kala sha̱kei saikora, ngarikazata yur kala yongkazata vānaobing, 11okathuiwui awungabing kala miyur saikora, wungnaobing kala ngalei khamungabing saikora, 12yaronnaobing kala ngalānaobing khalatta, kasarnaobing kala angangnaobing.
13Athumna ithumwui Avāwui mingli sochikatranu, kaja awui mingmāng khāngchikata; awui tekhamatei okathui kala kazingramli juimei. 14Ana awui mibingwui vang yāng khāngkai, awui katharabing saikorawui vang masot, ali nganaihaira Israelwui mibingwui vang. Hallelujah!
