詩篇 148

148 ¹ 哈利路亞! 你哋喺天上讚美我哋嘅父; 喺至高之處讚美佢。 ² 佢嘅眾天使啊,都讚美佢; 佢嘅諸天萬軍啊,都讚美佢。 ³ 太陽同月亮啊,都讚美佢; 閃耀嘅眾星啊,你哋都讚美佢。 ⁴ 至高嘅諸天啊,你哋讚美佢; 天上嘅眾水啊,你哋都讚美佢。 ⁵ 願佢哋都讚美我哋嘅父嘅名,因為佢一發命令,佢哋就受造成形。 ⁶ 佢將佢哋堅立,直到永永遠遠; 佢頒下嘅命令,永遠都唔會廢去。

⁷ 你哋喺地上讚美我哋嘅父, 你哋啲海裏嘅活物同一切深海啊, ⁸ 火同冰雹、雪同雲霧、成就佢話語嘅狂風啊, ⁹ 大山同一切嘅小山、 結果子嘅樹同一切香柏樹啊, ¹⁰ 野獸同一切牲畜、爬行嘅動物同飛翔嘅雀鳥啊, ¹¹ 地上嘅君王同萬民、 王子同地上一切嘅官長啊, ¹² 後生仔同後生女、老人家同細路仔啊,你哋都一齊讚美佢。

¹³ 願佢哋都讚美我哋嘅父嘅名,因為只有佢嘅名係至高嘅; 佢嘅榮光,超越咗天同地。 ¹⁴ 佢為自己嘅子民興起力量, 叫佢一切忠信嘅人得到讚美,就係以色列嘅子民,佢哋親近 佢。哈利路亞!