Mga Awit 148

148 ¹ Aleluya! Purihin ang ating Ama mula sa kalangitan; purihin siya sa kaitaasan. ² Purihin siya, lahat ng kaniyang mga anghel; purihin siya, lahat ng kaniyang mga hukbo. ³ Purihin siya, araw at buwan; purihin siya, lahat kayong nagniningning na mga bituin. ⁴ Purihin siya, kayong pinakamataas na kalangitan, at kayong mga tubig sa itaas ng kalangitan. ⁵ Purihin nila ang pangalan ng ating Ama, sapagkat siya ay nag-utos at sila ay nilikha. ⁶ Itinatag niya sila magpakailanman; nagbigay siya ng utos na hindi mawawala.

⁷ Purihin ang ating Ama mula sa lupa, kayong mga nilalang sa dagat at lahat ng kalaliman ng karagatan, ⁸ apoy at granizo, niyebe at ulap, unos na hangin na tumutupad sa kaniyang salita, ⁹ mga bundok at lahat ng burol, mga punong namumunga at lahat ng sedro, ¹⁰ mababangis na hayop at lahat ng bakahan, mga gumagapang na nilalang at lumilipad na mga ibon, ¹¹ mga hari sa lupa at lahat ng mga bayan, mga prinsipe at lahat ng mga pinuno ng lupa, ¹² mga binata at mga dalaga, mga matatanda at mga bata.

¹³ Purihin nila ang pangalan ng ating Ama, sapagkat ang kaniyang pangalan lamang ang dakila; ang kaniyang kaningningan ay nasa itaas ng lupa at langit. ¹⁴ Itinaas niya ang lakas para sa kaniyang bayan, kapurihan para sa lahat ng kaniyang mga tapat, para sa bayan ng Israel na malapit sa kaniya. Aleluya!