Pyakulengwa Pyonsene, N'simbeni Iye
Kucemerwa kwa ntendo kubulukira kudzulu mpaka pantsi: aanju, dzuwa na mwezi, buluka penepo pinyama pya m'bara, mphepo na mvula, mapiri, miti, pinyama, madzimambo na ana. Pinthu pyonsene pinacemerwa pidacitwa na fala yakutonga, pontho pyonsene pisaphembwa kutawira na dzina ibodzi: Baba wathu.
148 1Haleluya! Simbani Baba wathu kubulukira kudzulu; n'simbeni Iye kudzulu kwakulewa. 2N'simbeni Iye, aanju ace onsene; n'simbeni Iye, nkhondo zace zonsene. 3N'simbeni Iye, dzuwa na mwezi; n'simbeni Iye, imwe nyenyezi zonsene zinawala. 4N'simbeni Iye, imwe kudzulu kwakulewa kakamwe, na imwe madzi ali padzulu pa kudzulu. 5Asimbe dzina ya Baba wathu, thangwi Iye apereka ntemo mbapicitwa. 6Iye aakhazikisa kwenda na kwenda kosene; apereka ntemo wakuti nkhabe kudzamala.
7Simbani Baba wathu kubulukira pa dziko, imwe pinyama pya m'bara na kuzika konsene kwa bara, 8moto na matalala, neve na nkhungu, mphepo yamphamvu inakwanirisa fala yace, 9mapiri na mitunda yonsene, miti ya misapo na mikedhru yonsene, 10pinyama pya kuthengo na pifuyo pyonsene, pinyama pinakwakwaira na mbalame zinabvuluka, 11amambo a pantsi pa dziko na mbumba zonsene, akulu na atongi onsene a dziko, 12aphale na asikana pabodzi pene, akalamba na ana.
13Asimbe dzina ya Baba wathu, thangwi dzina yace yokhene ndi yakulewa kakamwe; ukulu wace uli padzulu pa dziko na kudzulu. 14Iye alamusa mphamvu ya mbumba yace, kusimbwa kwa anyakukhulupirika ace onsene, kwa mbumba ya Izarayeli ali dhuzi na Iye. Haleluya!
