ਜ਼ਬੂਰ 148

148 ¹ ਹਲਲੂਯਾਹ! ਅਕਾਸ਼ਾਂ ਤੋਂ ਸਾਡੇ ਪਿਤਾ ਦੀ ਉਸਤਤ ਕਰੋ; ਉਚਿਆਈਆਂ ਵਿੱਚ ਉਸਦੀ ਉਸਤਤ ਕਰੋ। ² ਹੇ ਉਸਦੇ ਸਾਰੇ ਦੂਤੋ, ਉਸਦੀ ਉਸਤਤ ਕਰੋ; ਹੇ ਉਸ ਦੀਆਂ ਸਾਰੀਆਂ ਸੈਨਾਓ, ਉਸਦੀ ਉਸਤਤ ਕਰੋ। ³ ਹੇ ਸੂਰਜ ਅਤੇ ਚੰਦ, ਉਸਦੀ ਉਸਤਤ ਕਰੋ; ਹੇ ਸਾਰੇ ਚਮਕਦੇ ਤਾਰਿਓ, ਉਸਦੀ ਉਸਤਤ ਕਰੋ। ⁴ ਹੇ ਸਭ ਤੋਂ ਉੱਚੇ ਅਕਾਸ਼ੋ, ਉਸਦੀ ਉਸਤਤ ਕਰੋ, ਅਤੇ ਹੇ ਅਕਾਸ਼ਾਂ ਦੇ ਉੱਪਰਲੇ ਪਾਣੀਓ। ⁵ ਓਹ ਸਾਡੇ ਪਿਤਾ ਦੇ ਨਾਮ ਦੀ ਉਸਤਤ ਕਰਨ, ਕਿਉਂ ਜੋ ਉਸਨੇ ਹੁਕਮ ਦਿੱਤਾ ਅਤੇ ਓਹ ਰਚੇ ਗਏ। ⁶ ਉਸਨੇ ਓਹਨਾਂ ਨੂੰ ਸਦਾ ਸਦਾ ਲਈ ਕਾਇਮ ਕੀਤਾ; ਉਸਨੇ ਇੱਕ ਬਿਧੀ ਦਿੱਤੀ ਜੋ ਟਲੇਗੀ ਨਹੀਂ।

⁷ ਧਰਤੀ ਤੋਂ ਸਾਡੇ ਪਿਤਾ ਦੀ ਉਸਤਤ ਕਰੋ, ਹੇ ਸਮੁੰਦਰੀ ਜੀਵੋ ਅਤੇ ਸਾਰੀਓ ਸਾਗਰ ਦੀਓ ਡੂੰਘਾਈਓ, ⁸ ਅੱਗ ਅਤੇ ਗੜੇ, ਬਰਫ਼ ਅਤੇ ਧੁੰਦ, ਉਸਦੇ ਬਚਨ ਨੂੰ ਪੂਰਾ ਕਰਨ ਵਾਲੀ ਤੂਫ਼ਾਨੀ ਹਵਾ, ⁹ ਪਹਾੜੋ ਅਤੇ ਸਾਰੀਓ ਪਹਾੜੀਓ, ਫਲਦਾਰ ਰੁੱਖੋ ਅਤੇ ਸਾਰੇ ਦਿਆਰੋ, ¹⁰ ਜੰਗਲੀ ਜਾਨਵਰੋ ਅਤੇ ਸਾਰੇ ਡੰਗਰੋ, ਘਿੱਸਰਨ ਵਾਲੇ ਜੀਵੋ ਅਤੇ ਉੱਡਣ ਵਾਲੇ ਪੰਛੀਓ, ¹¹ ਧਰਤੀ ਦੇ ਰਾਜਿਓ ਅਤੇ ਸਾਰੀਓ ਕੌਮੋ, ਸਰਦਾਰੋ ਅਤੇ ਧਰਤੀ ਦੇ ਸਾਰੇ ਹਾਕਮੋ, ¹² ਜੁਆਨ ਮਰਦ ਅਤੇ ਮੁਟਿਆਰਾਂ ਇੱਕੋ ਜਿਹੇ, ਬੁੱਢੇ ਅਤੇ ਬੱਚੇ।

¹³ ਓਹ ਸਾਡੇ ਪਿਤਾ ਦੇ ਨਾਮ ਦੀ ਉਸਤਤ ਕਰਨ, ਕਿਉਂ ਜੋ ਕੇਵਲ ਉਸੇ ਦਾ ਨਾਮ ਮਹਾਨ ਹੈ; ਉਸਦਾ ਪਰਤਾਪ ਧਰਤੀ ਅਤੇ ਅਕਾਸ਼ ਤੋਂ ਉੱਪਰ ਹੈ। ¹⁴ ਉਸਨੇ ਆਪਣੀ ਪਰਜਾ ਲਈ ਬਲ ਖੜਾ ਕੀਤਾ ਹੈ, ਆਪਣੇ ਸਾਰੇ ਭਗਤਾਂ ਲਈ ਉਸਤਤ, ਇਸਰਾਏਲ ਦੀ ਪਰਜਾ ਲਈ ਜੋ ਉਸਦੇ ਨੇੜੇ ਹੈ। ਹਲਲੂਯਾਹ!