ای بوتون خئلقت، اونا حمد ادئن
یوخاریدان آشاغی بئر حمد سیاهیسی: ملکلر، گونش و آی، سونرا دهنز مخلوقلاری، هاوا، داغلار، آغاجلار، حیوانلار، پادشاهلار و اوشاقلار. آدی چکئلن هر شی امرله یارانیب و هر شیدن ائسته‌نئلئر کی، بئر آد ائله جاواب ورسئن: آتامیز.
148 1هَلِلویاه! گؤیلردن آتامیزا حمد ادئن؛ اوجالاردا اونا حمد ادئن. 2ای اونون بوتون ملکلری، اونا حمد ادئن؛ ای اونون بوتون قوشونلاری، اونا حمد ادئن. 3ای گونش و آی، اونا حمد ادئن؛ ای بوتون پاریلدایان اولدوزلار، اونا حمد ادئن. 4ای گؤیلرئن لاپ اوجالاری، اونا حمد ادئن، و گؤیلرئن اوستونده اولان سولار. 5قوی اونلار آتامیزین آدینا حمد اتسئنلر، چونکی او امر اتدی و اونلار یاراندیلار. 6او اونلاری ابددن ابده‌جک برقرار اتدی؛ کچمه‌یه‌جک بئر حؤکم وردی.
7یردن آتامیزا حمد ادئن، ای دهنز مخلوقلاری و بوتون درئنلئکلر، 8اود و دولو، قار و دومان، اونون سؤزونو یرئنه یتئرن طوفان یلی، 9داغلار و بوتون تپه‌لر، میوه‌لی آغاجلار و بوتون سئدر آغاجلاری، 10وحشی حیوانلار و بوتون مال-حیوانلار، سوروننلر و اوچان قوشلار، 11دونیانین پادشاهلاری و بوتون خالقلار، اَمئرلر و دونیانین بوتون حؤکمدارلاری، 12جاوان اوغلانلار و جاوان قیزلار بئرلئکده، قوجالار و اوشاقلار.
13قوی اونلار آتامیزین آدینا حمد اتسئنلر، چونکی آنجاق اونون آدی اوجادیر؛ اونون جلالی یر و گؤیون اوستونده‌دئر. 14او اؤز خالقی اوچون قووّت اوجالتدی، بوتون وفالی‌لاری اوچون حمد، اونا یاخین اولان ائسرایئل خالقی اوچون. هَلِلویاه!
