اے ټول مخلوقاته، د هغۀ ثنا وکړئ

له پورته څخه ښکته د ستاینې نوملړ: پرښتې، لمر او سپوږمۍ، بیا سمندري ژوي، هوا، غرونه، ونې، څاروي، پاچایان او ماشومان. هر هغه څه چې نوم یې اخیستل شوی د امر په واسطه جوړ شوي، او له هر څه غوښتل کېږي چې په یوه نوم ځواب ورکړي: زموږ پلار.

څپرکی 148.

هللويا! د آسمانونو نه زمونږ د پلار ثنا وکړئ؛ په اوچتو ځايونو کښې يې ثنا وکړئ. اے د هغۀ ټولو فرښتو، د هغۀ ثنا وکړئ؛ اے د هغۀ ټولو لښکرو، د هغۀ ثنا وکړئ. اے نمره او سپوږمۍ، د هغۀ ثنا وکړئ؛ اے ټولو ځلېدونکو ستورو، د هغۀ ثنا وکړئ. اے تر ټولو اوچتو آسمانونو، د هغۀ ثنا وکړئ، او اے د آسمانونو نه پورته اوبو. دوئ دې زمونږ د پلار د نوم ثنا وکړى، ځکه چې هغۀ حُکم وکړو او دوئ پېدا شول. هغۀ دوئ د تل دپاره قائم کړل؛ هغۀ داسې حُکم ورکړو چې هيڅکله به ختم نۀ شى.

د زمکې نه زمونږ د پلار ثنا وکړئ، اے د سمندر مخلوقاتو او د سمندرونو ټولو ژورو، اے اوره او ږلۍ، واوره او دُوند، اے طوفانى بادِه چې د هغۀ کلام پوره کوې، اے غرونو او ټولو غونډيو، اے مېوه دارو ونو او ټولو د ديار ونو، اے ځنګلى ځناورو او ټولو څارويو، اے خزنده ژويو او الوتونکو مرغانو، اے د زمکې بادشاهانو او ټولو قومونو، اے شهزادګانو او د زمکې ټولو حاکمانو، اے ځوانانو او ځوانو جينکو، اے بوډاګانو او ماشومانو.

دوئ دې زمونږ د پلار د نوم ثنا وکړى، ځکه چې يواځې د هغۀ نوم سرلوړے دے؛ د هغۀ شان و شوکت د زمکې او آسمان نه پورته دے. هغۀ د خپلو خلقو دپاره طاقت پورته کړو، د خپلو ټولو وفادارو دپاره ثنا، د اِسرائيل د خلقو دپاره چې هغۀ ته نزدې دى. هللويا!