Zaburi 148

148 ¹ Haleluya! Msifuni Baba yetu kutoka mbinguni; msifuni katika mahali palipo juu. ² Msifuni, enyi malaika wake wote; msifuni, enyi majeshi yake yote. ³ Msifuni, jua na mwezi; msifuni, enyi nyota zote zing'aazo. ⁴ Msifuni, enyi mbingu zilizo juu sana, na enyi maji yaliyo juu ya mbingu. ⁵ Na vilisifu jina la Baba yetu, kwa maana aliamuru, navyo vikaumbwa. ⁶ Akaviimarisha milele na milele; akatoa amri isiyopita.

⁷ Msifuni Baba yetu kutoka nchini, enyi viumbe vya baharini na vilindi vyote vya bahari, ⁸ moto na mvua ya mawe, theluji na ukungu, upepo wa dhoruba utimizao neno lake, ⁹ milima na vilima vyote, miti ya matunda na mierezi yote, ¹⁰ wanyama wa mwitu na wanyama wote wa kufugwa, vitambaavyo na ndege warukao, ¹¹ wafalme wa dunia na watu wote, wakuu na watawala wote wa dunia, ¹² vijana waume na vijana wake pia, wazee na watoto.

¹³ Na wasifu jina la Baba yetu, kwa maana jina lake peke yake limetukuka; fahari yake i juu ya nchi na mbingu. ¹⁴ Amewainulia watu wake nguvu, sifa kwa waaminifu wake wote, kwa ajili ya watu wa Israeli walio karibu naye. Haleluya!