Zaburi 147

147 ¹ Haleluya! Jinsi ilivyo vyema kumwimbia sifa Baba yetu; jinsi kilivyo kupendeza na kufaa kumsifu.

² Baba yetu anaijenga Yerusalemu; anawakusanya watu wa Israeli waliotawanyika. ³ Anawaponya waliovunjika moyo, na kuvifunga vidonda vyao. ⁴ Anazihesabu nyota; anaziita zote kwa majina yake. ⁵ Baba yetu Mtawala ni mkuu, na mwenye nguvu nyingi; ufahamu wake hauna kipimo. ⁶ Baba yetu anawainua wanyenyekevu; anawaangusha waovu chini ardhini.

⁷ Mwimbieni Baba yetu kwa shukrani; mpigieni muziki kwa kinubi. ⁸ Anazifunika mbingu kwa mawingu; anaipelekea nchi mvua; anayafanya majani kumea vilimani. ⁹ Anawapa wanyama chakula chao, na makinda ya kunguru yanapolia. ¹⁰ Furaha yake haiko katika nguvu za farasi, wala hapendezwi na miguu ya mwanadamu. ¹¹ Moyo wa Baba yetu hufurahia wale wanaomcha yeye, wale wanaotumaini upendo wake wa agano.

¹² Msifu Baba yetu, ee Yerusalemu! Msifu Baba yako, ee Sayuni! ¹³ Kwa maana anaimarisha makomeo ya malango yako; anawabariki watoto wako ndani ya kuta zako. ¹⁴ Analeta amani katika mipaka yako; anakushibisha kwa ngano iliyo bora. ¹⁵ Anaipeleka amri yake duniani; neno lake hupiga mbio kwa haraka. ¹⁶ Anatoa theluji kama sufu; anasambaza barafu kama majivu. ¹⁷ Anavurumisha mvua yake ya mawe kama makombo; ni nani awezaye kusimama mbele ya baridi yake? ¹⁸ Analituma neno lake na kuiyeyusha barafu; anauamsha upepo wake, na maji yanatiririka. ¹⁹ Analitangaza neno lake kwa Yakobo, sheria zake na hukumu zake kwa Israeli. ²⁰ Hajalitenda hili kwa taifa lingine lolote; hawazijui hukumu zake. Haleluya!