Ina Kyawun Rera Yabo

Ubanmu yana ƙidaya taurari yana kuma ba kowane suna, yana kuma ɗaure masu karyayyar zuciya; yana aiko da dusar ƙanƙara da ƙanƙara, sa'an nan maganar da take narkar da su. Abin da yake faranta masa ba ƙarfin doki ko ƙarfin mutum ba ne, sai dai mutane masu begen ƙaunarsa.

Babi na 147.

Halleluya! Ina kyawun rera yabo ga Ubanmu; ina daɗi kuma ya dace a yabe shi.

Ubanmu yana gina Urushalima; yana tattara mutanen Isra'ila da suka warwatse. Yana warkar da masu karyayyar zuciya, yana kuma daure raunukansu. Yana ƙidaya taurari; yana kiran kowanne da sunansa. Mai girma ne Ubanmu Mai Iko, mai ƙarfin iko kuma; fahimtarsa ba ta da iyaka. Ubanmu yana ɗaga masu tawali'u; yana kuma fyaɗa da mugaye har ƙasa.

Ku rera waƙa ga Ubanmu da godiya; ku yi masa kiɗi da molo. Yana rufe sammai da gizagizai; yana aiko da ruwan sama a ƙasa; yana sa ciyawa ta tsiro a kan tuddai. Yana ba wa dabbobi abincinsu, da kuma 'ya'yan hankaki sa'ad da suke kuka. Ba ya murna da ƙarfin doki ba, ba ya kuma jin daɗin ƙafafun mutum ba. Zuciyar Ubanmu tana jin daɗin masu tsoronsa, da masu sa zuciya ga madawwamiyar ƙaunarsa.

Ki yabi Ubanmu, ya ke Urushalima! Ki yabi Ubanki, ya ke Sihiyona! Gama yana ƙarfafa ƙyamaren ƙofofinki; yana sa wa 'ya'yanki albarka a cikin katangarki. Yana kawo salama ga iyakokinki; yana ƙosar da ke da alkama mafi kyau. Yana aiko da umarninsa zuwa duniya; maganarsa tana gudu da sauri. Yana ba da dusar ƙanƙara kamar ulu; yana baza raɓar daskare kamar toka. Yana zuba ƙanƙararsa kamar gutsattsarin burodi; wa zai iya tsayawa a gaban sanyinsa? Yana aiko da maganarsa, yă kuma narkar da ƙanƙara; yana hura iskarsa, ruwaye kuma su malalo. Yana sanar da maganarsa ga Yakubu, ƙa'idodinsa da hukunce-hukuncensa ga Isra'ila. Bai yi haka ga wata al'umma dabam ba; ba su san hukunce-hukuncensa ba. Halleluya!