መዝሙር 147 FHB Father's Heart Bible™

147 ¹ሃሌሉያ! ንኣቦና ምዝማር ኽንደይ ፅቡቕ እዩ፤ ንእኡ ምምስጋን ክንደይ ዘሐጕስን ዝግባእ እዩ።

²ኣቦና ንኢየሩሳሌም ይሃንፃ፤ ነቶም ዝተበተኑ ህዝቢ እስራኤል ይእክቦም። ³ነቶም ልቦም ዝተሰብረ ይፍውስ፤ ቑስሎምውን ይእስር። ⁴ንከዋኽብቲ ይቖፅሮም፤ ንነፍሲ ወከፎም በብስሞም ይፅውዖም። ⁵ጐይታና ኣቦ ዓብዪ ብሓይሉውን ብርቱዕ እዩ፤ ምስትውዓሉ መጠን የብሉን። ⁶ኣቦና ንትሑታት ልዕል የብሎም፤ ንሓጥኣን ግና ናብ ምድሪ የውድቖም።

⁷ንኣቦና ብምስጋና ዘምሩ፤ ብበገና ቕነዩሉ። ⁸ንሰማያት ብደመና ይኸድኖ፤ ንምድሪ ዝናም ይሰደላ፤ ኣብ እምባታት ሳዕሪ የብቍል። ⁹ነቶም እንስሳታት ምግቦም ይህቦም፤ ነቶም እናኣእወዩ ዘለዉ ጨቓዊት ኳዃትውን። ¹⁰ባህ ዘብሎ ብሓይሊ ፈረስ ኣይኮነን፤ ባህ ዘብሎውን ብኣእጋር ሰብ ኣይኮነን። ¹¹ልቢ ኣቦና በቶም ዝፈርሕዎ፥ በቶም ብምሕረቱ ተስፋ ዝገብሩ ይሕጐስ።

¹²ኦ ኢየሩሳሌም፥ ንኣቦና ኣመስግኒ! ኦ ፅዮን፥ ንኣቦኺ ኣመስግኒ! ¹³ንጋድማት ደገታትኺ የፅንዖም እዩ እሞ፤ ነቶም ኣብ ውሽጢ ቕፅርኺ ዘለዉ ደቅኺ ይባርኮም። ¹⁴ንወሰናትኺ ሰላም ይገብረሎም፤ ብዝበለፀ ስርናይ የፅግበኪ። ¹⁵ትእዛዙ ናብ ምድሪ ይሰድድ፤ ቃሉ ቐልጢፉ ይጐዪ። ¹⁶ንበረድ ከም ፀምሪ ይህብ፤ ንኣስሓይታ ኸም ሓሙዅሽቲ ይበትን። ¹⁷ንበረዱ ኸም ፍርፋር ይድርብዮ፤ ኣብ ቅድሚ ዛሕሉ መን ደው ክብል ይኽእል? ¹⁸ቃሉ ሰዲዱ ነቲ በረድ የመክኾ፤ ንፋሱ የናውፅ፤ ማያትውን ይፈስሱ። ¹⁹ቃሉ ንያእቆብ ይነግሮ፤ ሕግጋቱን ፍርድታቱን ንእስራኤል። ²⁰ነዝ ንዝኾነ ካልእ ህዝቢ ኣይገበረን፤ ንፍርድታቱ ኣይፈልጥዎን እዮም። ሃሌሉያ!