Sākashe Mibingwui Eina Ili Yangmilu
Laa sābingwui akhavāli. Davidwui laa.
Kasāk kahai ngayāk kasāwui seihor: morhāli pāmrinhai khārlungli kakhui mibing, atam kachida ngāngcham kasamrā kala lamwui pheili khaphāng kathāi. Davidna ngāngchamwui masoli ngachammi khavai awui Avāli ngakao, kala ngareiyāo kasāk mibingwui ngayung chi kakhanang hāngkhavai da ngachei.
140 1O iwui Avā, makaphā mibingwui eina ili kankhuimilu; sākashebingwui eina ili khamayonmilu, 2athumwui wuklungli makaphā ngarāna, kala ngakaikashi raimina khuishoka. 3Athumna athumwui male phara̱ thāda kakharā; athumwui morchai azingli phara̱wui kathiri leiya.
4O iwui Avā, makhayābingwui pāng eina ili yangmilu; sākashe mibingwui eina ili khamayonmilu, ili rekakharek khavai ngarānping. 5Langkasobingna iwui vang khalen thummihaira; athumna khalenwui khara̱ sangkahai; shongfa ayarli athumna iwui vang khalen sangmihaira.
6Ina iwui Avāli hānga, "Na iwui Avāna." Iwui kapowui khavaokhon kashāmilu. 7O iwui Avā, iwui huikhamiwui pangshapa, rai zimiksholi nana iwui kuili ngākmihaira. 8O iwui Avā, makhayābingwui ningkachāng mamihaialu; athumwui zakkashi khangarān maungshung ngasakalu, maningakha athum ngakarthuira.
9Ili kuinama kajibingwui kui chiwui vang, athum khalattawui morchaiwui kakhanangna athumli ngaphaoror ngasakranu. 10Meithā khamaringa athumwuitungli tāranu; katang mangakarthuithuk khavai athumli meilungli kala rāhuk chombingli horsangranu. 11Khamashāt mi ngaleili mashāranu; makaphāna sākashe mili kashao-kashao eina phāshangranu.
12Ina thei kaja ithumwui Avāna kachotabingli vang khangachona, kala khavātabingwui mashun bichar sāra. 13Khamashungabingna kachangkhata namingli ningkashi mira; khangatarbingna nawui mangāli pānra.
