Iriibwa eng' Che Koroom
Po kandoindetap musik. Tyenutap Daudi.
Saaet ne po ng'wanindo ne kagichoptos: piik che tinyei ng'wonetap erenook eng' oriit kutinwekwak che chirchirei lugeet eng' peetuut komugul ak che chopchin poroonik korop ooreet. Soomei Daudi Kwandanyi koriip metinnyi eng' peetuutap lugeet, ak iyani kele iyachi che nyalilso ng'aleekwak.
140 1Isarwo, Kwandanyu, eng' piik che yaacheen; iriibwa eng' che koroom, 2che chopchin yaityet eng' mugulelwekwak ak ichirchir lugoosyek eng' peetuut komugul. 3Ngalitei tongoanikwak ko uu ndaret; mi ng'wonetap erenook eng' oriit kutinwekwak.
4Iriibwa, Kwandanyu, eng' eutap kiptengeginik; iriibwa eng' che koroom, che chopchin kobutyeiwo. 5Kagouny che menotik mesteet agobo anee; kagoyom poroonigap regereiywot; eng' chametap ooreet kagochopchiwo mestonok.
6Ka aleenji Kwandanyu ale, “Ii Kwandanyu.” Igas tweguunetap saautikyuk. 7Ee Kiptaiyat Kwanda, kimnateetap yetunennyu, ka iriip metinnyu eng' peetuutap lugeet. 8Amat igoochi, Kwandanyu, magutigap kiptengeginik; amat isuldochi perberindanywa, si ma king'eetyee.
9Agobo metitap che yiemei anee, ingotuch icheek nyalildap kutinwekwak. 10Ingobunjo nesek che lalyotin eng' icheek; ingewiirtoi eng' maat, eng' keriingonigap meneet, si ma king'eetyee agaigai. 11Amat kogimit chiito ne imwae ng'oroorek che yaacheen eng' emet; ingocheeng' yaityet chiito ne koroom, pareet eng' pareet.
12Angen ale iyachi Kwandanyo ng'aleegap che nyalilso, ak koyachi kirwoogetap kibananook. 13Iman, koweekyi piigap iman kongoi kaineng'ung'; komeny che ung'oot eng' taing'ung'.