Saamu 140

140 ¹Gbà mí, Baba mi, lọ́wọ́ àwọn ènìyàn búburú; pa mí mọ́ kúrò lọ́wọ́ àwọn oníwà ipá, ²àwọn tí ń pète ibi nínú ọkàn wọn, tí wọ́n sì ń dá ogun sílẹ̀ ní gbogbo ọjọ́. ³Wọ́n ń pọ́n ahọ́n wọn mú bí ejò; oró paramọ́lẹ̀ ń bẹ lábẹ́ ètè wọn.

⁴Dáàbò bò mí, Baba mi, lọ́wọ́ àwọn ẹni ìkà; pa mí mọ́ kúrò lọ́wọ́ àwọn oníwà ipá, àwọn tí wọ́n gbèrò láti mú mi kọsẹ̀. ⁵Àwọn agbéraga ti fi pàkúté pamọ́ fún mi; wọ́n ti tẹ́ okùn àwọ̀n sílẹ̀; lẹ́gbẹ̀ẹ́ ọ̀nà wọ́n ti dẹ ìdẹkùn fún mi.

⁶Mo wí fún Baba mi pé, “Ìwọ ni Baba mi.” Gbọ́ ohùn ẹ̀bẹ̀ àánú mi. ⁷Baba Olódùmarè, agbára ìgbàlà mi, ìwọ ti dáàbò bo orí mi ní ọjọ́ ogun. ⁸Má ṣe fún àwọn ẹni ìkà ní ìfẹ́-ọkàn wọn, Baba mi; má ṣe jẹ́ kí ète wọn yọrí sí rere, bí bẹ́ẹ̀ kọ́ wọn yóò gbéraga.

⁹Ní ti orí àwọn tí wọ́n yí mi ká, jẹ́ kí ibi ètè ara wọn bò wọ́n mọ́lẹ̀. ¹⁰Jẹ́ kí ẹ̀yín iná ṣubú lù wọ́n; jẹ́ kí a jù wọ́n sínú iná, sínú kòtò pẹ̀tẹ̀pẹ́tẹ̀, kí wọ́n má baà tún dìde mọ́. ¹¹Má ṣe jẹ́ kí abanijẹ́ fìdí múlẹ̀ ní ilẹ̀ náà; jẹ́ kí ibi dọdẹ ọkùnrin oníwà ipá, ní ìkọlù lórí ìkọlù.

¹²Mo mọ̀ pé Baba wa yóò gbé ẹjọ́ àwọn tí à ń ni lára ró, yóò sì ṣe ìdájọ́ òdodo fún àwọn aláìní. ¹³Nítòótọ́, àwọn olódodo yóò dúpẹ́ fún orúkọ rẹ; àwọn olótìítọ́ yóò máa gbé níwájú rẹ.