Ngitĩra Harĩ Andũ a Haaro

Kũrĩ mũtongoria wa aini. Thaburi ya Daudi.

Ihooya rĩkoniĩ ũũru ũrĩa mũbangĩre: andũ arĩa marĩ na thumu wa nduĩra rungu rwa mĩromo yao, arĩa marahũragia mbaara o mũthenya na magategaga mĩtego hakuhĩ na njĩra. Daudi nĩathaitha Ithe wake amũgitĩre mũthenya wa mbaara, na nĩehokete atĩ arĩa anyariire nĩmakaiguuo ciira wao.

Gĩcunjĩ 140.

Honokia, Awa, kuuma kũrĩ andũ ooru; ũngitĩre harĩ andũ a haaro, arĩa mathugundaga ũũru ngoroinĩ ciao, na makaarahũra mbaara mũthenya wothe. Manooraga nĩmĩ ciao ta nyoka; thumu wa nduĩra ũrĩ rungu rwa mĩromo yao.

Ngitĩra, Awa, kuuma mookoinĩ ma arĩa aaganu; ũngitĩre harĩ andũ a haaro, arĩa mabangĩte kũngũrũnjia. Andũ arĩa etĩĩi nĩmaahithĩte mũtego nĩ ũndũ wakwa; nĩmatambũrũkĩtie ndigi cia wabu; hakuhĩ na njĩra nĩmanjigĩire mĩtego.

Ndeerire Ithe wakwa atĩrĩ, “Wee nĩ we Ithe wakwa.” Igua mũgambo wa mathaithana makwa ma kũhooya tha. Wee Awa Mũnene, hinya wa kũhonokio gwakwa, nĩũhumbĩire mũtwe wakwa mũthenya wa mbaara. Ndũkanaheane, Awa, merirĩria ma arĩa aaganu; ndũkanareke mĩbango yao ĩkinyanĩre, nĩguo matikeeyambararie.

Ha ũhoro wa mĩtwe ya arĩa maathiũrũrũkĩirie niĩ, thĩĩna wa mĩromo yao ene ũmahumbĩre. Makara ma mwaki nĩmagwe igũrũ rĩao; nĩmateeo mwakiinĩ, marimainĩ ma ndooro, matigaacooka kũrahũka rĩngĩ. Mũcambania ndakehaandithio bũrũriinĩ; ũũru nĩũkaguĩma mũndũ ũrĩa wa haaro, mahũũra igũrũ rĩa mahũũra.

Nĩnjũũĩ atĩ Ithe witũ nĩagaatiirĩrĩra ciira wa arĩa anyamaarie, na arehere athĩĩni kĩhooto. Ti-itherũ arĩa athingu nĩmagaacookeria rĩĩtwa rĩaku ngaatho; arĩa arũngĩrĩru magaatũũra mbere yaku.