Sekbülakbü Müt ka Ngo Khümenashi
Chia leiyeibou shanga. Dawideibü chi.
Amaibü jembü shanga welau: sembung phanga pinyueibü kom kibü mütshuong, aoyouei chalou angboua wapyobü thungeida hoba lamnyu phanga sung phokuda. Dawidei haoeibü Bou to lason chaloua khümenbü ngakei, hoba khonkubü shuongeibü ngüh ditlabü hoba matjem kümbulabü dogo mailemda.
140 1Abou, amaibü müt ka ngo khümenashi; sekbülakbü müt ka ngo püetashi, 2haoenei lulueibü maangpona amaibü damsepanda, hoba chalou angboua wapyobü thungeida. 3Haoenei lulueibü tongde pinyu tegü uda; kom kibü pinyueibü kom haoeneibü sembung phanga ki.
4Abou, amaibü shuongeibü ik ka ngo lomashi; sekbülakbü müt ka ngo püetashi, aoei ngo phaiyettila damsepanko kikei. 5Lilibü shuongei kü shanga sung che huan phokei; haoenei tak namlüh shenko shaikei; lamnyua haoenei kü shanga sung sankuakei.
6Ngei kü Bou to laukei, “No kü Bou ki.” Onou shanga ngeibü subüjabü ngüh ditashi. 7O Bunyubou, ngeibü khümenbü hau, lason chaloua nyi ngeibü khua yuklepbei. 8Abou, amaibü shuongeibü maangsühbü tekuma; haoeneibü damsepan tehaükuti, aingenyu haoen loenlabü.
9Ngo kaijembü shuongeibü khu shangaje, haoen lulueibü sembungeibü khonsakei haoen thüka baushi. 10Longbü wankak haoen thüka tuongshi; haoen wan to jinshi, nainyu püngkhüna, haoen touje nyibou aloenlabü. 11Himou lenbü müt kaonyeka tonen akishi; amaibüei sekbülakbü müt ngüm phainei ngümei shieikoeshi.
12Ngei ngekei, seneibü Bouei khonkubü shuongeibü janbü phokulabü hoba khambü shuong shanga matjem kümbulabü. 13Maimaitham saopobü shuongei kaibü nyen la nyensang kulabü; maang tangbü shuong nyi thedanga kilabü.
